حجاب پر پابندی لگانے والے بی جے پی کے وزیر تعلیم کو شکست

سنہ 2021 میں انڈین ریاست کرناٹک میں بھارتیہ جنتا پارٹی (بی جے پی) کا ایک چہرہ ایسا تھا جو ہر وقت سرخیوں کی زینت بنا رہتا تھا، یہ تھے ریاست کے وزیر تعلیم بی سی ناگیش۔

اخبار انڈین ایکسپریس کے مطابق حجاب تنازعے سے لے کر سکولوں کے نصاب میں ’اپنے نظریات‘ شامل کرنے کے الزام تک، ناگیش نہ صرف ریاست میں ہر مذہبی تنازعے کا محور رہے ہیں، بلکہ اپوزیشن کی تمام تر تنقید کا ہدف بھی رہے ہیں۔

سینچر کو بی سی ناگیش ایک بار پھر خبروں کی زینت بنے تاہم اس مرتبہ وجہ تھی ان کی ریاستی اسمبلی کی سیٹ کے انتخابات میں شکست۔ انہیں ضلع تمکر سے اپنے مخالف کانگریسی امیدوار کے ہاتھوں 17 ہزار سے زائد ووٹوں سے شکست ہوئی۔

بی جے پی کے قومی جنرل سیکریٹری بی ایل سنتوش کے قریبی ساتھی مانے جانے والے، 64 سالہ سیاست دان نے زندگی کے اوائل میں ہی سخت گیر مذہبی نظریات کو قبول کرتے ہوئے اے بی وی پی میں شمولیت اختیار کی تھی۔ انہوں نے آر ایس ایس میں اور تمکر ضلعے کے بی جے پی سیکریٹری کے طور پر بھی خدمات انجام دیں۔ وہ پہلی بار 2008 میں ممبر صوبائی اسمبلی منتخب ہوئے تھے۔ 2013 میں انہیں شکست ہوئی اور 2018 میں 25 ہزار سے زائد ووٹوں کے فرق سے دوبارہ منتخب ہوئے۔

حجاب تنازعے کے دوران بی سی ناگیش کو کلاس رومز میں حجاب پہننے پر پابندی لگا کر مسلمان لڑکیوں کو تعلیم سے ’محروم‘ کرنے پر شدید تنقید کا سامنا کرنا پڑا۔ یہ معاملہ ابھی بھی عدالت میں ہے تاہم سابق وزیر تعلیم ہمیشہ سے ہی تعلیمی اداروں میں حجاب پر پابندی کے حامی رہے ہیں۔

ناگیش اور ان کی انتظامیہ کو آزادی پسند بھگت سنگھ اور سماجی مصلح نارائن گرو پر مشتمل اسباق کو سکولوں کے نصاب سے نکالنے کے لیے بھی تنقید کا نشانہ بنایا گیا، ان کی جگہ آر ایس ایس کے بانی کے ایچ ہیڈگیوار اور دائیں بازو کے نظریے سے وابستہ دیگر افراد کی تقاریروں کو شامل کیا گیا۔

تنقید کے بعد بھگت سنگھ اور نارائن گرو پر مشتمل اسباق کو دوبارہ شامل کر لیا گیا لیکن ہیڈگیوار کی تقریریں بھی برقرار رکھی گئیں۔