پاکستانی عازمینِ حج کو بسوں کے ذریعے منیٰ کی خیمہ بستی پہنچانے کے انتظامات مکمل

مناسک حج کی ادائیگی کے لیے پاکستانی عازمینِ حج کو بسوں کے ذریعے منیٰ کی خیمہ بستی پہنچانے کے انتظامات مکمل کر لیے گئے ہیں۔

مکہ مکرمہ میں پاکستان حج مشن میں سیکریٹری مذہبی امور کی زیر صدارت منیٰ روانگی کے حوالے سے اجلاس میں ڈی جی حج، ڈائریکٹر حج مکہ و مدینہ، ڈائریکٹر معاونین، سہولت و تعاون نے بریفنگ دی۔

بریفنگ میں بتایا گیا کہ پاکستانی عازمینِ حج کو بسوں کے ذریعے منیٰ کی خیمہ بستی پہنچانے کے انتظامات مکمل کر لیے گئے۔ اور سعودی مکاتب نے پاکستانی عازمینِ حج کو خیموں کے کارڈ، ٹرین ٹکٹ کی تقسیم بھی مکمل کر لی ہے۔

بریفنگ میں حکام نے بتایا کہ سرکاری حج سکیم کے عازمین کے لیے منیٰ کی خیمہ بستی میں 19 مکاتب  حاصل کیے گئے ہیں۔

حکام کے مطابق 51 ہزار 267 عازمینِ حج کو مشاعر ٹرین کی سہولت مہیا کی جائے گی جبکہ 30 ہزار 185 عازمینِ حج کو بسوں کے ذریعے منیٰ، عرفات اور وادی مزدلفہ لایا جائے گا۔

بریفنگ کے مطابق سعودی مکاتب آج 7 اور 8 ذی الحج کی درمیانی شب عازمینِ حج کی منیٰ روا نگی کا آغاز کریں گے۔ عازمینِ حج کل 8 ذی الحج کا دن اور رات  منیٰ کی خیمہ بستی میں قیام کریں گے۔

بریفنگ کے بعد جاری کیے گئے بیان کے مطابق موسم کی شدت سے بچانے کے لیے بیشتر عازمین کی روانگی رات کو عمل میں لائی جائے گی۔ اور نو ذی الحج کو تمام عازمینِ کرام بسوں اور مشاعر ٹرین کے ذریعے میدان عرفات پہنچیں گے۔

حکام نے بتایا کہ میدان عرفات میں حج کا رکن اعظم ادا کرنے کے بعد حجاج کرام مزدلفہ پہنچیں گے۔

سیکریٹری مذہبی امور ڈاکٹر آفتاب اکبر درانی نے اس موقع پر کہا کہ عازمینِ کرام ایام حج میں اپنے ہمراہ مختصر سامان رکھیں، گرمی سے بچنے کے لیے چھتری، مشروبات کا استعمال کریں۔

اُن کا کہنا تھا کہ رہنمائی کے لیے موبائل ایپ Hajj Navigator اور سبز سکارف پہنے معاونین حج سے مدد حاصل کریں۔ ’عازمینِ حج مناسک حج کی ادائیگی کے لیے مکاتب کے مقرر کردہ اوقات  کار کی سختی سے پیروی کریں اور ساتھی عازمینِ حج، ضعیف افراد اور خواتین کا خیال رکھیں، اسی طرح مشاعر کے تقدس کو پیش نظر رکھیں۔‘