سعودی عرب کے کئی علاقوں میں جمعے تک بارش کے حوالے سے الرٹ، احتیاط کی اپیل
سعودی عرب کے کئی علاقوں میں جمعے تک بارش کے حوالے سے الرٹ، احتیاط کی اپیل
منگل 10 اکتوبر 2023 0:00
سعودی شہری اور مقیم غیر ملکی وادیوں، سیلابی مراکز سے دور رہیں (فوٹو: عرب نیوز)
سعودی محکمہ شہری دفاع نے کہا ہے کہ ’سعودی عرب کے بیشترعلاقوں میں مسلسل بارش کی پیشگوئی کے پیش نظر احتیاطی تدابیر اختیار کی جائیں‘۔
خبررساں ادارے ایس پی اے کے مطابق شہری دفاع نے بیان میں کہا کہ ’سعودی شہری اور مقیم غیر ملکی وادیوں، سیلابی مراکز سے دور رہیں۔ محفوظ مقامات تک خود کو محفوظ رکھیں۔ بارش یا سیلاب سے جمع ہونے والے پانی میں نہ جائیں‘۔
بیان میں کہا گیا کہ ’ موسمیات کے قومی مرکز نے پیر سے جمعے تک مملکت کے بیشتر علاقوں میں گرج چمک کے ساتھ بارش کی پیشگوئی کی ہے‘۔
عسیر، جازان اور باحہ ریجن بھی گرد الود ہواوں اور بارش کی زد میں ہوں گے (فوٹو عرب نیوز)
مکہ مکرمہ ریجن میں درمیانے درجے سے موسلا دھار تک بارش اور ژالہ باری کے امکانات ہیں۔ سیلاب کا بھی خدشہ ہے۔
طائف، میسان، اضم اور العرضیات میں گرد آلود تیز ہواؤں کا سلسلہ جمعے تک جاری رہے گا۔
عسیر، جازان اور باحہ ریجن بھی گرد آلود ہواؤں کے علاوہ موسلا دھار بارش کی زد میں ہوں گے۔
مکہ مکرمہ شہر، الجموم، الکامل کے علاوہ مدینہ منورہ، شمالی حدود، الجوف، تبوک اور حائل ریجنوں میں گرد آلود تیز ہواؤں کے ساتھ بوندا باندی سے درمیانے درجے تک کی بارش متوقع ہے۔
