انوکھا میچ، چلی ویمن ٹیم کی ارجنٹائن کے خلاف 64 نو بالز

کرکٹ میں نئے ریکارڈز تو بنتے اور ٹوٹتے رہتے ہیں تاہم حالیہ دنوں میں ایک ایسا میچ بھی ہوا جو اپنی نوعیت میں ایک منفرد میچ مقابلہ ثابت ہوا ہے۔

یہ ٹی20 میچ چلی اور ارجنٹائن کی ویمنز ٹیم کے درمیان بیونس آئرس میں کھیلا گیا جس میں ارجنٹائن نے ٹاس ہار کر پہلے بیٹنگ کرتے ہوئے مقررہ اوورز میں صرف ایک وکٹ کے نقصان پر 427 رنز بنا ڈالے۔

اس کے جواب میں چلی کی ویمنز ٹیم 15 اوورز میں صرف 65 کے سکور پر ہی ڈھیر ہوگئی اور یوں یہ میچ ارجنٹائن نے 364 رنز سے جیت لیا۔

اس میچ میں ارجنٹائن کی بیٹر لُوسیا ٹیلر نے 27 چوکے رسید کرتے ہوئے 84 گیندوں پر 169 رنز بنائے جبکہ اُن کی ساتھی البرٹینا گلان 23 چوکے لگا کر 84 گیندوں پر 145 رنز بنانے میں کامیاب ہوئیں۔

ارجنٹائن کی واحد وکٹ 350 کے سکور پر گری جبکہ لُوسیا اور البرٹینا کی یہ 350 رنز کی پارٹنرشپ ٹی20 کرکٹ کی تاریخ کی سب سے بڑا پارنٹرشپ بن گئی۔

چلی کی جانب سے واحد وکٹ جیسیکا مرانڈا نے لی جنہوں نے چار اوورز میں 64 رنز دیے۔

حیران کن طور پر 427 رنز کے ٹوٹل میں ارجنٹائن کی بیٹرز نے کوئی بھی چھکا نہ لگایا۔

اس منفرد میچ میں چلی کی بولروں کی جانب سے 73 ایکسٹرا رنز دیے گئے جس میں 64 نو بالز شامل تھیں۔ 
 

اسی طرح بولنگ کرتے ہوئے چلی کی بولر کونسٹنزا اویارس نے چار اوورز میں بغیر کوئی وکٹ لیے 92 رنز دیے جو کے ایک نیا ریکارڈ ہے۔

427 رنز کے ہدف کے جواب ارجنٹائن کی بولروں نے بھی 29 ایکسٹرا رنز دیے جس میں 26 وائڈ بالز شامل تھیں جبکہ چلی کی سات بیٹرز صفر کے سکور پر آؤٹ ہوئیں۔

خیال رہے ارجنٹائن کا چلی کے خلاف 427 رنز کا سکور ویمنز ٹی20 کرکٹ میں ایک اننگز میں سب سے زیادہ سکور ہے۔

اس سے قبل یہ ریکارڈ بحرین ویمنز ٹیم کے پاس تھا جنہوں نے سعودی عرب کے خلاف ٹی20 میچ میں 318 رنز بنائے تھے۔