بِگ بیش لیگ: سڈنی تھنڈر کی پوری ٹیم صرف 15 کے سکور پر ڈھیر

آسٹریلوی ٹی20 لیگ بگ بیش کے میچ میں سڈنی تھنڈر 15 کے سکور پر ڈھیر ہوگئی۔

سڈنی تھنڈر نے 5.5 اوورز میں 15 رنز بنائے اور اس کے تمام کھلاڑی آؤٹ ہوگئے۔

جمعے کے روز سڈنی کے شو گراؤنڈ سٹیڈیم میں کھیلے گئے میچ میں ایڈیلیڈ سٹرائیکرز نے ٹاس جیت کر پہلے بیٹنگ کرتے ہوئے مقررہ اوورز میں 9 وکٹوں کے نقصان پر 139 رنز بنائے۔

ایڈیلیڈ سٹرائیکرز کی جانب سے دیے گئے 140 رنز کے ہدف کے تعاقب میں سڈنی تھنڈر کی پوری ٹیم صرف 15 رنز پر 5.5 اوورز میں ہی ڈھیر ہوگئی۔

سڈنی تھنڈر کی جانب سے برینڈن ڈوگٹ نے سب زیادہ 4 رنز بنائے جبکہ رائلی رُوسو نے 3 اور ایلکس روز نے 2 سکور بنائے۔

سڈنی تھنڈر کے مجموعی سکور میں دو وائڈ بالز اور ایک لیگ بائے کا فاضل رن بھی شامل تھے۔

 ایڈیلیڈ سٹرائیکرز کی جانب سے ہینری تھورٹون نے 5، ویس ایگر نے 4 جبکہ میتھیو شارٹ نے ایک کھلاڑی کو آؤٹ کیا۔

15 سکور کے کم ترین سکور پر آؤٹ ہونے والی سڈنی تھنڈر کے پانچ کھلاڑی صفر پر آؤٹ ہوئے۔

ٹی20 کی تاریخ کا سب سے کم سکور

اس سے پہلے یہ ریکارڈ ترکیہ کے پاس تھا جس میں انہوں نے 2019 میں چیک ریپبلک کے خلاف ٹی20 میچ میں صرف 21 رنز بنائے تھے۔

15  سکور پر آؤٹ ہونے پر سڈنی تھنڈر کی جانب سے سماجی رابطوں کی ویب سائٹ ٹوئٹر پر شدید مایوسی کا اظہار کیا گیا۔ آسٹریلیا کے سابق فاسٹ بولر بریٹ لی نے اس بارے میں کہا کہ ’میرے پاس الفاظ نہیں ہیں، میں نے ایسی کارکردگی آج تک نہیں دیکھی، اگر آپ اس کے بارے میں سوچیں تو یہ بہت ہولناک بات ہے۔‘

سڈنی تھنڈر کے 15 سکور پر آؤٹ ہونے کے بعد ٹوئٹر پر دلچسپ تبصرے دیکھنے کو مِل رہے ہیں۔

 15 سکور پر پوری ٹیم کے آؤٹ ہونے پر کرک انفو نے بھی حیرانی کا اظہار کرتے ہوئے کہا کہ ’یہ بی بی ایل میں ابھی کیا ہوا؟ سڈنی تھنڈر کی پوری اننگز صرف 35 گیندوں کی مہمان رہی۔‘

نِکھل کہتے ہیں کہ ’حیران ہوں کہ 2022 مزید کیا دکھائے گا۔‘

ہمانشو پریک نے انڈین پریمیئر لیگ (آئی پی ایل) کی ٹیم آر سی بی پر طنزیہ ٹویٹ کرتے ہوئے کہا کہ ’آر سی بی کے مداح آج بہت خوش ہوں گے، ان کے 48 رنز کا ریکارڈ آج ٹوٹ گیا، سڈنی تھنڈر 15 رنز پر آؤٹ ہوگئی، ٹیم میں ایلکس ہیلز، رائلی رُوسو اور ڈینیل سیمز جیسے کھلاڑی تھے۔‘

ڈنینیل چَرنی ٹیم کے کھلاڑیوں کا انفرادی سکور بتاتے ہوئے مزاحیہ انداز میں کہتے ہیں کہ ’سڈنی تھنڈر کی مِمبر شپ لینے کا نیا ہاٹ لائن نمبر ہے 0411030200۔‘

پنتھا برمان لکھتی ہیں کہ ’اس لیول پر 15 رنز بنا کر پوری ٹیم آؤٹ ہوگئی؟ یہ شرمناک ہے، سمجھ نہیں آرہی کہ سڈنی تھنڈر کی ٹیم اس صدمے باہر آ بھی سکے گی یا نہیں۔‘