سٹیڈیم میں ’پاکستان زندہ باد‘ کا نعرہ لگانے سے روک دیا

انڈیا میں پاکستان اور آسٹریلیا کے درمیان کھیلے گئے میچ کے دوران پاکستانی تماشائی کو ’پاکستان زندہ باد‘ کا نعرہ لگانے سے روکنے کی ویڈیو وائرل ہو گئی۔

اس کے بعد انڈین پولیس اور سٹیڈیم کی انتظامیہ پر تنقید کے ساتھ انڈیا میں انٹرنیشنل ایونٹ کرانے پر بھی سوالات اٹھائے جا رہے ہیں۔

جمعے کو انڈیا کے شہر بنگلور میں پاکستان اور آسٹریلیا کے میچ کے دوران پاکستانی تماشائی کو انڈین پولیس اہلکار کی جانب سے ’پاکستان زندہ باد‘ کا نعراہ لگانے سے روک دیا گیا۔ 

بنگلور کے ایم چناسوامی سٹیڈیم میں پاکستان اور آسٹریلیا کے درمیان ورلڈ کپ کا 18 واں میچ کھیلا جا رہا ہے۔

سوشل میڈیا پر وائرل ویڈیو کلپ میں انڈین پولیس اہلکار کو ’بھارت ماتا کی جے از گُڈ بٹ پاکستان زندہ باد اِز ناٹ گُڈ‘ یعنی ’بھارت ماتا کی جے کہنا اچھا ہے لیکن پاکستان زندہ بعد کہنا اچھا نہیں ہے‘، کہتے دیکھا جا سکتا ہے۔

سوشل میڈیا پر ویڈیو کلپ شیئر کرتے ہوئے ٹوئٹر ہینڈل مالک پر لکھا گیا کہ ’ پاکستانی جرسی پہنے یہ نوجوان پاکستان زندہ باد کا نعرہ نہیں لگا سکتا، یہ ملک کیسے ورلڈ کپ کی میزبانی کر سکتا ہے۔ یہ ناانصافی۔‘

ٹوئٹر صارف حمزہ قریشی نے نے سوال کیا کہ ’انڈین پولیس اہلکار نے پاکستانی تماشائی کو پاکستان زندہ باد کا نعرے لگانے سے روک دیا جب کہ انڈین شائقین ’بھارت ماتا کی جے‘ سمیت پاکستان مخالف نعرے لگاتے رہے لیکن انہیں کسی نے نہیں روکا۔ کیوں؟‘

شفاعت شاہ نے سوشل میڈیا پر وائرل ہونے والی اس ویڈیو کے حوالے سے لکھا کہ ’یہ تعصب کی انتہا ہے، انڈین پولیس اہلکار پاکستانی کرکٹ شائقین کو پاکستان زندہ باد کا نعرہ لگانے سے روک رہا ہے۔‘

سیاسی تجزیہ کار مبشر زیدی نے انڈین پولیس اہلکار کی جانب سے پاکستانی تماشائی کو نعرہ لگانے سے روکنے کے معاملے پر کہا کہ ’اگر آپ نے انڈیا کے حالات کو گذشتہ دہائی میں جان بوجھ کر نظرانداز کیا ہے تو انڈین پولیس کا اس طرح کا رویہ آپ کے لیے حیران کن اور پریشان کن ہو سکتا ہے۔‘

’انڈین پولیس کے اس طرح کے رویے کے بعد کوئی بے وقوف ہی ہو گا جو انڈیا جائے گا، اس طرح کی ویڈیوز مزید بھی آئیں گی۔‘