العربیہ ٹی وی کے مطابق اسلامی تعاون تنظیم (او آئی سی) نے کہا ہے کہ وہ مقبوضہ فلسطینی علاقہ جات کی صورتحال کی وجہ سے سعودی عرب کے دارالحکومت ریاض میں اگلی اتوار کو ایک غیرمعمولی اجلاس منعقد کرے گی۔
العربیہ ٹی وی نے کہا ہے کہ یہ اجلاس سعودی عرب کی دعوت پر منعقد کیا جا رہا ہے۔
خیال رہے اسرائیلی حکام کے مطابق گذشتہ مہینے سات اکتوبر کو اسرائیل پر حماس کے حملے میں 1400 افراد ہلاک ہوئے تھے جن میں زیادہ تر عام شہری تھے۔
اس حملے کے بعد سے اسرائیل حماس کو کچلنے کے لیے غزہ کی پٹی پر مسلسل حملے کر رہا ہے۔ حماس کے زیرانتظام وزارت صحت کے مطابق اسرائیل کے فضائی حملوں میں اب تک نو ہزار 770 فلسطینی ہلاک ہوئے ہیں جو زیادہ تر عام شہری ہیں۔
اقوام متحدہ کے بیان میں کہا گیا ہے کہ 23 ہزار سے زائد افراد زخمی ہوئے ہیں جن کو فوری طبی امداد کی ضرورت ہے۔
اقوام متحدہ کے بیان کے مطابق ’غزہ میں پوری آبادی محصور ہے اور ان پر حملے ہو رہے ہیں۔ زندہ رہنے کے لیے ضروری اشیا تک رسائی سے بھی محروم ہیں۔ ان کے گھروں، عبادت گاہوں، ہسپتالوں پر بمباری کی گئی۔ یہ ناقابل قبول ہے۔‘
