مکہ مکرمہ اور جدہ میں بارش، ریڈ الرٹ جاری

مکہ مکرمہ سمیت جدہ کے جنوبی اور مشرقی محلوں میں موسلادھار بارش ہوئی ہے جبکہ مطلع صبح سے ابر آلود ہے۔

سبق ویب سائٹ کے مطابق محکمہ موسمیات نے دونوں شہروں کے لیے ریڈ الرٹ جاری کردیا ہے جبکہ میونسپلٹی، ہلال احمر، محکمہ ٹریفک اور دیگر امدادی اداروں نے ہنگامی حالات کا نفاذ کردیا ہے۔

مکہ مکرمہ کے بیشتر محلوں کے علاوہ مسجد الحرام میں زور کی بارش ہوئی ہے جبکہ محکمہ موسمیات کی پیشگوئی کے مطابق شام تک مزید بارش کی توقع ہے۔

ادھر جدہ میں عزیزیہ، مشرفہ، بنی مالک اور شہر کے جنوبی اور اور مشرقی محلوں میں صبح سے وقفے وقفے سے بارش کا سلسلہ جاری ہے۔

جبکہ شمالی اور وسطی محلوں میں کہیں کہیں ہلکی بارش ہوئی ہے تاہم مطلع ابر آلود ہے اور گرج چمک کا سلسلہ جاری ہے۔

جدہ میونسپلٹی نے کہا ہے کہ ’کسی بھی ہنگامی حالت سے نمٹنے کے لیے تیاریاں مکمل کرلی گئی ہیں جبکہ پانی صاف کرنے کی گاڑیوں کے علاوہ اضافی نفری تعینات کردی گئی ہے‘۔