انڈیا کی ورلڈ کپ فائنل میں ناقص بیٹنگ، ’وہ آؤٹ ہوا تو 140 کروڑ لوگ دُکھی ہوئے‘

آئی سی سی کرکٹ ورلڈ کپ کے فائنل میں آسٹریلیا کے خلاف انڈیا کی بیٹنگ لائن لڑکھڑانے کے بعد انڈین ٹیم نے کینگروز کو ورلڈ کپ جیتنے کے لیے 241 رنز کا ہدف دیا ہے۔

اتوار کو احمد آباد کے نریندر مودی سٹیڈیم میں کھیلے گئے میچ میں انڈیا نے مقررہ 50 اوورز میں 10 وکٹوں کے نقصان پر 240 رنز بنائے۔

آسٹریلیا کے بولرز نے انڈین بلے بازوں کو کھل کر سکور نہ کرنے دیا جس کے باعث پوری اننگز میں انڈین بلے باز شدید دباؤ کا شکار رہے۔

صرف یہ نہیں بلکہ آسٹریلیا کے بولرز کا فیلڈرز نے بھی خوب ساتھ نبھایا اور اننگز کے دوران کینگروز کی فیلڈنگ غیرمعمولی رہی۔

انڈیا کی جانب سے اس اننگز میں سب سے زیادہ 66 سکور کے ایل راہُل نے کیا تاہم انہوں نے یہ سکور 107 گیندوں پر بنایا۔

انڈیا کی فائنل میں ناقص بیٹںگ پر سماجی رابطوں کی ویب سائٹ ایکس (ٹوئٹر) پر کرکٹ مداحوں کی جانب سے تاثرات کا اظہار بھی کیا جا رہا ہے۔

وراٹ کوہلی نے اس میچ میں 54 رنز بنائے اور پیٹ کمنز کی گیند پر بولڈ ہو گئے، اس بارے میں ٹوئٹر ہینڈل میمز والا لڑکا نے لکھا کہ ’آؤٹ وہ ہوا، دکھی 140 کروڑ لوگ ہوئے تھے۔‘
 

فرضی کرکٹر لکھتے ہیں کہ ’تماشائیوں نے اتنی خاموشی سے میچ دیکھا ہے، پھر تم بھائی، گھر ٹی وی پر ہی میچ دیکھ لیتے۔‘
 

آکُل بھردواج اپنی ٹویٹ میں لکھتے ہیں کہ ’ہم نے 50 رنز کم بنائے۔ 20 رنز آسٹریلیا نے غیر معمولی فیلڈنگ سے بچائے۔ 30 کے ایل راہُل اور سوریا کمار یادو نے خراب رننگ کر کے نہیں بنائے۔‘
 

وِشال نے ٹویٹ کی کہ ’بولا تھا اپنی بیٹنگ لائن ایک دن ایکسپوز (ناکام) ہوگی، خاص طور پر مشکل پچ پر۔‘
 

سوچاریتا نے ٹی وی پر میچ کی تصویر شیئر کرتے ہوئے لکھا کہ ’یہ میں نیند سے بیدار ہونے کے بعد کیا دیکھ رہی ہوں۔‘