آسٹریلیا کے خلاف پہلا ٹیسٹ میچ، پاکستان پلیئنگ الیون سکواڈ کا اعلان

پاکستان کرکٹ بورڈ نے آسٹریلیا کے خلاف پہلے ٹیسٹ میچ کے لیے  پلیئنگ الیون سکواڈ کا اعلان کر دیا ہے۔

ٹیسٹ کپتان شان مسعود نے بدھ کو پرتھ میں پریس کانفرنس سے خطاب میں سکواڈ کا اعلان کیا۔

پلیئنگ الیون میں کپتان شان مسعود سمیت امام الحق، عبداللّٰہ شفیق، بابر اعظم، سعود شکیل، سرفراز احمد، سلمان علی آغا، فہیم اشرف، شاہین شاہ آفریدی، عامر جمال اور خرم شہزاد شامل ہیں۔

ٹیسٹ میچ میں فاسٹ بولر خرم شہزاد اور عامر جمال ٹیسٹ ڈیبیو کریں گے۔

آسٹریلیا اور پاکستان کے درمیان تین ٹیسٹ میچوں پر مشتمل سیزیز کا پہلا میچ پرتھ میں 14 دسمبر سے شروع ہوگا، دوسرا ٹیسٹ 26 دسمبر کو میلبرن اور تیسرا تین جنوری سے سڈنی میں کھیلا جائے گا۔

خیال رہے یہ سیریز آئی سی سی ورلڈ ٹیسٹ چیمپیئن شپ کا حصہ ہے اور پاکستانی ٹیم ورلڈ ٹیسٹ چیمپیئن شپ کے پوائنٹس ٹیبل پر دو میچ کھیلنے کے بعد 100 فیصد کامیابی کے ساتھ پہلے نمبر پر موجود ہے۔

آسٹریلوی ٹیم میں کپتان پیٹ کمنز، ڈیوڈ وارنر، عثمان خواجہ، مارنوس لبوشین، سٹیو سمتھ، مچل مارش، ٹریوس ہیڈ، الیکس کیری اور مچل سٹارک شامل ہیں۔

پاکستان کے خلاف پہلے میچ کے لیے نیتھن لائن اور جوش ہیزل ووڈ بھی آسٹریلوی ٹیم کا حصہ ہیں۔

خیال رہے کہ پاکستان کے نئے ٹیسٹ کپتان شان مسعود آسٹریلیا میں پرائم منسٹرز ایلیون کے خلاف وارم اپ میچ میں ڈبل سینچری بنا چکے ہیں۔

آسٹریلیا روانہ ہونے سے پہلے کپتان شان مسعود نے پریس کانفرنس سے خطاب میں کہا تھا کہ آسٹریلیا کے ساتھ ٹیسٹ سیریز ایک چیلنج ہے، وہاں کی کنڈیشنز پاکستان سے مختلف ہیں مگر جیت کے لیے پُرعزم ہیں۔

انہوں نے کہا تھا کہ آسٹریلیا کے ساتھ تین ٹیسٹ میچوں پر مشتمل سیریز کا سکواڈ ’سیٹلڈ‘ ہے لیکن جہاں ضرورت ہو گی تبدیلیاں کی جائیں گی۔

شان مسعود نے کہا کہ ’صائم ایوب پاکستان کے لیے بہت اچھا اضافہ ہیں۔ بابر اعظم ہمارے بہترین بیٹر ہیں، ان کی پوزیشن نمبر چار ہے اور اسے کوئی نہیں چھیڑے گا۔‘