عاطف اسلم کی جذباتی مداح کی سٹیج پر آمد، گلے لگا لیا

معروف گلوکار عاطف اسلم کی فین فالوونگ پاکستان سمیت دنیا بھر میں ہے۔

عاطف اسلم اپنے ملک سمیت دنیا بھر میں جہاں بھی جاتے ہیں وہاں اُن کے مداحوں کی بڑی تعداد انہیں گھیر لیتی ہے اور اُن سے ملنے کی کوشش کرتی ہے۔

ایسا ہی ایک واقعہ گزشتہ ہفتے بنگلہ دیش میں پیش آیا جب دوران کنسرٹ عاطف اسلم کی خاتون مداح نے سٹیج پر آ کر انہیں گلے لگا لیا۔

ہندوستان ٹائمز کے مطابق سوشل میڈیا پر وائرل ویڈیو میں دیکھا جا سکتا ہے کہ عاطف اسلم کو سٹیج پر ایک نوجوان لڑکی گلے لگا لیتی ہے۔

اس دوران لڑکی عاطف اسلم سے باتیں کرتی ہوئی دکھائی دیتی ہے تاہم سکیورٹی اہلکار جب انہیں عاطف سے الگ کرنے آتے ہیں تو وہ اس پر بھی رضامند نہیں ہوتی۔

ویڈیو میں مزید دیکھا جا سکتا ہے کہ مداح عاطف اسلم کے ہاتھ پر بوسہ بھی لیتی ہے اور پھر سکیورٹی اہلکار انہیں سٹیج سے نیچے اتار دیتے ہیں۔
 

دوران کنسرٹ عاطف اسلم نے اپنے سپرہٹ گانے گائے جن میں ’تیرا ہونے لگا ہوں‘، ’تیرے سنگ یارا‘، ’میں رنگ شربتوں کا‘ اور ’دل دیاں گلاں‘ شامل ہیں۔

اس سے قبل امریکہ میں کنسرٹ کے دوران بھی عاطف اسلم کے ساتھ ایک دلچسپ واقعہ پیش آیا تھا جب کچھ مداحوں کی جانب سے اُن پر نوٹ پھینکے گئے تھے۔

اس واقعہ کی ویڈیو بھی سوشل میڈیا پر وائرل ہوئی جس میں گلوکار کو میوزک روک کر مداحوں کو سمجھاتے ہوئے دیکھا گیا۔

عاطف اسلم نے مداحوں کو کہا تھا کہ ’میرے دوست، آپ یہ پیسے واپس لے سکتے ہیں اور انہیں خیرات کر سکتے ہیں۔‘

انہوں نے مزید کہا تھا کہ ’براہ کرم واپس آئیے، مجھے علم ہے کہ آپ بہت امیر ہیں جس کی میں بہت قدر کرتا ہوں۔ براہ کرم یہ پیسے خیرات میں دے دیں۔ مجھے یہ اچھا لگا لیکن پیسوں کی بے قدری مت کریں۔ مجھ پر پیسے مت پھینکیں۔‘