دورہ آئرلینڈ اور انگلینڈ کے لیے قومی سکواڈ کا اعلان: حارث رؤف اور حسن علی کی واپسی

پاکستان کرکٹ بورڈ نے آئرلینڈ اور انگلینڈ کے خلاف ٹی ٹوئنٹی سیریز کے لیے 18 رکنی قومی سکواڈ کا اعلان کر دیا ہے۔

جمعرات کو چیف سلیکٹرز وہاب ریاض، محمد یوسف، عبدالرزاق اور بلال افضل نے پریس کانفرنس کرتے ہوئے قومی سکواڈ کا اعلان کیا۔

18 رکنی قومی سکواڈ کی کپتانی بابر اعظم کریں گے۔

سکواڈ میں ابرار احمد، اعظم خان، فخر زمان، حارث رؤف، حسن علی، افتخار احمد، عماد وسیم، محمد عباس آفریدی، محمد عامر، محمد رضوان، محمد عرفان خان، نسیم شاہ، صائم ایوب، سلمان علی آغا، شاداب خان، شاہین شاہ آفریدی اور عثمان خان شامل ہیں۔

فاسٹ بولر حارث رؤف اور آل راؤنڈرز حسن علی سمیت سلمان علی آغا کو سکواڈ میں دوبارہ شامل کیا گیا ہے۔

سلیکشن کمیٹی کے رکن محمد یوسف نے کہا کہ نیوزی لینڈ کے خلاف سیریز سے قبل انجری کا شکار ہونے والے اعظم خان اب فِٹ ہیں، جبکہ محمد رضوان بھی اب مکمل طور پر فٹ ہیں لہٰذا دونوں کھلاڑی سکواڈ کاحصہ ہیں۔

سلیکشن کمیٹی کا کہنا ہے کہ جون سے امریکہ اور ویسٹ انڈیز میں شروع ہونے والے ٹی ٹوئنٹی ورلڈ کپ کے لیے 15 رکنی ٹیم کا اعلان انگلینڈ کے خلاف پہلے ٹی ٹوئنٹی کے بعد کیا جائے گا۔

خیال رہے کہ ٹی ٹوئنٹی ورلڈ کپ کے لیے ٹیم کے اعلان کی آخری تاریخ 24 مئی ہے۔

سلیکشن کمیٹی نے کہا کہ غیرمعمولی ٹیلنٹ کی دستیابی کی وجہ سے ٹیم کا انتخاب آسان نہ تھا۔

آئرلینڈ کے خلاف سیریز 10 سے 14 مئی تک کھیلی جائے گی جبکہ انگلینڈ کے خلاف سیریز 22 سے 30 مئی تک ہو گی۔