انڈیا کے ارب پتی تاجر مکیش امبانی کی اہلیہ نیتا امبانی اپنے شاہانہ طرز زندگی کے باعث اکثر خبروں میں رہتی ہیں۔
ریلائنس فاؤنڈیشن کی چیئرپرسن نیتا امبانی کی حال ہی میں انٹرنیٹ پر ایک تصویر وائرل ہوئی ہے جس میں انہیں دنیا کا مہنگا ترین پانی ’ ایکوا دی کرسٹالو‘ پیتے دیکھا جا سکتا ہے۔
مزید پڑھیں
گزشتہ کچھ روز سے سوشل میڈیا پلیٹ فارمز پر نیتا امبانی کی یہ تصویر شیئر کی جا رہی ہے جس میں دعویٰ کیا گیا ہے کہ نیتا امبانی دنیا کا مہنگا ترین پانی پیتی ہیں جس کی قیمت 60 ہزار ڈالر ہے۔
کیا واقعی نیتا امبانی اتنا مہنگا پانی پیتی ہیں؟
جہاں ’ایکوا دی کرسٹالو‘ برانڈ کے پانی پر سوشل میڈیا صارفین بحث کرتے دکھائی دیے وہیں معلوم ہوا ہے کہ جس تصویر میں نیتا امبانی کو یہ پیتے دکھایا گیا ہے وہ تصویر جعلی ہے۔
نیتا امبانی کی اصل تصویر 2015 کے آئی پی ایل میچ کے دوران لی گئی تھی جہاں وہ اپنے بیٹے آکاش امبانی اور سابق کرکٹر انیل کمبلے کے ساتھ بیٹھی نظر آ رہی ہیں۔
مذکورہ تصویر میں دیکھا جا سکتا ہے کہ نیتا امبانی پلاسٹک کی بوتل سے پانی پی رہی ہیں۔ تاہم اس کا حال ہی میں وائرل ہونے والی تصویر سے موازنہ کیا جائے تو معلوم ہوتا ہے کہ اصل تصویر میں موجود پانی کی بوتل کو ایڈیٹ کر کے ’ایکوا دی کرسٹالو‘ سے تبدیل کر دیا گیا ہے۔
’ایکوا دی کرسٹالو‘ نامی پانی اتنا مہنگا کیوں ہے؟
’ایکوا دی کرسٹالو‘ نامی پانی کا پورا نام Acqua di Cristallo Tributo a Modigliani ہے جسے معروف ڈیزائنر فرنینڈو الٹامیرانو نے اطالوی فنکار امادیو موڈیگلیانی کے 'ہیڈ آف وومین' کے مجسمے کو خراج تحسین پیش کرنے کے لیے ڈیزائن کیا تھا۔
