حج مقامات پر ایک ارب لٹر پانی فراہم کیا گیا: سعودی نیشنل واٹر کمپنی

سعودی نیشنل واٹر کمپنی نے کہا ہے کہ عرفات کے دن مکہ اور حج مقامات پر پمپ اور تقسیم کیے جانے والے پانی کی مقدار تقریبا ایک ارب لٹر تک پہنچ گئی ہے۔

ایس پی اے کے مطابق بیان میں کہا گیا کہ ’حج مقامات پر 286 ملین لٹر پانی استعمال ہوتا ہے جبکہ 704 ملین لٹر سے زیادہ مکہ کے پبلک واٹر سسٹم کے ذریعے تقسیم کیا جاتا ہے۔‘

اس کام میں کمپنی کے انجینیئرز اور سپروائزرز کی نگرانی اور فالواپ کی مدد حاصل کی تھی۔

کمپنی کا کہنا ہے کہ ’اس کے آپریشنز اور پانی کی فراہمی کا کام عازمین کی خدمت کے لیے پیشگی طے شدہ منصوبوں کے مطابق تھا۔‘

ان منصوبوں میں حج مقامات اور مسجد الحرام کے مقامات پر 24 گھنٹے پانی پمپ کرنا اس کے علاوہ مکہ مکرمہ کے مضافات کے لیے روزانہ 21 گھنٹے پمپنگ کو برقرار رکھنا شامل تھا۔

بیان میں اس بات کی تصدیق کی کہ فیلڈ ٹیمیں کسی بھی ہنگامی صورتحال سے نمٹنے کے لیے ہمیشہ تیار ہیں۔

کمپنی کا کہنا ہے  کہ ’عرفات کے دن تقربباً چار ہزار 840 لیبارٹری ٹیسٹ کیے تاکہ عازمین کو فراہم کیے جانے والے پانی کے معیار کو یقینی بنایا جا سکے۔‘