اٹلی کے مشہور جزیرے میں سیاحوں کے داخلے پر پابندی کیوں لگائی گئی؟
کیپری جزیرے کے مستقل رہائشیوں کی تعداد لگ بھگ 13 ہزار ہے (فائل فوٹو: اے ایف پی)
اٹلی میں مشہور ترین آٹھ جزیروں میں ایک کیپری میں سیاحوں کے داخلے پر پاندی عائد کر دی گئی ہے۔
خبر رساں ادارے اے ایف پی کے مطابق کیپری جزیرے کے میئر پاؤلو فالکو نے سنیچر کو بتایا کہ بعض علاقوں میں پانی کی ترسیل میں مسائل پیش آ رہے ہیں۔
میئرنے نیپلس اور جنوبی اٹلی کے علاقے سورینٹو سے آنے والی کشتیوں واپس لوٹ جانے کی ہدایت کی ہے۔
پاؤلو فالکو نے کہا کہ ’پانی کی سپلائی کے بغیر جزیرے میں آنے والے ’ہزاروں سیاحوں‘ کو بنیادی سہولیات کی فراہمی ناممکن ہے۔‘
انہوں نے کہا کہ ’صحت و صفائی کی صورت حال کافی خراب ہے۔ ہم نے ان مسائل سے نمٹنے کے لیے کچھ اقدامات اٹھائے ہیں اور ایک کرائسز یونٹ قائم کیا ہے۔‘
کیپری جزیرے کو پانی فراہم کرنے والی کمپنی کا کہا ہے کہ جمعرات کو مین لینڈ میں تکنیکی خرابی کی وجہ سے یہ مسئلہ پیدا ہوا ہے۔
روزانہ کی بنیاد پر اس جزیرے میں سیر وتفریح کے لیے ہزاروں افراد آتے ہیں (فائل فوٹو: اے ایف پی)
دوسری جانب کیپری کے میئر کا کہنا ہے کہ اس وقت ’حقیقی ایمرجنسی‘ کی کیفیت ہے اور جزیرے میں صرف پہلے کھڑا پانی موجود ہے اور اب اکثر ٹینک خالی ہو رہے ہیں۔
’روزانہ کی بنیاد پر اس جزیرے میں ہزاروں افراد کی آمد سے حالات مزید بگڑ سکتے ہیں۔‘
انہوں نے بتایا کہ ’اس وقت مقامی افراد گھر کے استعمال کے لیے صرف 25 لیٹر پانی سپلائی ٹینکر سے لے پا رہے ہیں۔‘
کیپری میں داخلے پر پابندی صرف سیاحوں کے لیے ہے جبکہ مقامی افراد اس سے مستثنیٰ ہیں۔
نپلیس کے ساحل پر واقع جزیرہ کیپری اپنے سفید وِلاز، خوب صورت ساحلی پٹی اور بڑے ہوٹلوں کی وجہ سے مشہور ہے۔
اس جزیرے کے مستقل رہائشیوں کی تعداد لگ بھگ 13 ہزار ہے لیکن روزانہ کی بنیاد پر اس جزیرے میں سیر وتفریح کے لیے ہزاروں افراد آتے ہیں۔
