امارات: کابینہ میں ردوبدل، شیخ حمدان بن محمد نائب وزیراعظم مقرر

متحدہ عرب امارات نے کابینہ میں ردوبدل کا اعلان کیا ہے جس میں شیخ حمدان بن محمد بن راشد المکتوم کی بطور وزیر دفاع اور نائب وزیراعظم تقرری شامل ہے۔

عرب نیوز کے مطابق دبئی کے حکمران شیخ محمد بن راشد المکتوم نے اتوار کو اپنے سوشل میڈیا اکاؤنٹ ایکس پر کہا ہے کہ شیخ حمدان ایسے رہنما ہیں جو اپنےعوام سے پیار کرتے ہیں اور عوام ان سے محبت کرتے ہیں۔

دبئی کے حکمران شیخ محمد نے مزید کہا ’ہمیں شیخ حمدان پر بے پناہ اعتماد ہے۔ وہ یواے ای کی حکومت میں بہت اہم اضافہ اور ملک کے مستقبل کی تشکیل میں بہترین ثابت ہوں گے۔‘

شیخ عبداللہ بن زید النہیان کو نائب وزیراعظم بھی نامزد کیا گیا ہے جب کہ وہ وزیر خارجہ کے عہدے پر برقرار ہیں۔

کابینہ میں دیگر اہم تقرریوں میں سارہ الامیری کو وزیر تعلیم نامزد کیا گیا ہے۔

احمد بیلہول وزیر کھیل، عبدالرحمان العوار قائم مقام وزیر برائے اعلیٰ تعلیم و سائنسی تحقیق اور محترمہ عالیہ المزروی وزیر مملکت برائے انٹرپرینیورشپ مقرر کی گئی ہیں۔