شاہ سلمان کی زیر صدارت کابینہ اجلاس، غزہ سمیت مختلف موضوعات پر بحث
شاہ سلمان کی زیر صدارت کابینہ اجلاس، غزہ سمیت مختلف موضوعات پر بحث
منگل 23 جولائی 2024 17:43
اجلاس میں مقامی سطح پر معیشت میں ہونے والے بہتری کو سراہا گیا(فوٹو، ایس پی اے)
خادم حرمین شریفین شاہ سلمان بن عبدالعزیز نے منگل کے روز سعودی کابینہ کے ہفتہ وار اجلاس کی صدارت کی جس میں مختلف موضوعات پر روشنی ڈالی گئی۔
سعودی خبررساں ایجنسی ’ایس پی اے‘ کے مطابق سعودی کابینہ کے اجلاس کے آغاز میں ولی عہد مملکت اور وزیراعظم شہزادہ محمد بن سلمان بن عبدالعزیز آل سعود سے گزشتہ ہفتے کے دوران مختلف ممالک کے سربراہوں جن میں فرانسیسی صدر ، روسی فیڈریشن کے صدر اور عراق کے وزیر اعظم کی جانب سے کیے گئے ٹیلی فونک رابطوں پر تبادلہ خیال کیا گیا جس میں مختلف موضوعات زیر بحث آئے تھے۔
وزیر اطلاعات سلمان الدوسری نے سعودی پریس ایجنسی کو بتایا کہ کابینہ نے عالمی اور علاقائی صورتحال پر بھی بحث کی جن میں سرفہرست مملکت کی جانب سے غزہ پٹی میں جنگ کے خاتمے اور یمن میں مستقل بنیادوں پر قیام امن کے لیے کی جانے والی کوششیں شامل تھیں۔
کابینہ نے سعودی عرب کی جانب سے کی جانے والی امن کوششوں کو سراہتے ہوئے اس بات پر زوردیا کہ خطے میں کشیدگی کو ختم کرنے کے لیے عالمی برادری اس حوالے سے فعال کردار ادا کرے۔
وزراء کونسل نے 57 برس سے فلسطین ہر اسرائیل کے غیرقانونی قبضے کے حوالے سے عالمی عدالت انصاف کی جانب سے جاری کردہ مشاورتی رائے کا خیرمقدم کیا ۔
ولی عہد سےمختلف ممالک کے سربراہوں کے ٹیلی فونک رابطوں پر بھی تبادلہ خیال کیا گیا(فوٹو، ایس پی اے)
مملکت کی جانب سے اس حوالے سے مسئلہ فلسطین کے منصفانہ اور جامع حل تک پہنچنے کے لیے عرب امن اقدام اور عالمی قراردادوں کی روشنی میں عملی اقدامات اٹھانے کی ضرورت پر زوردیا ۔
سعودی کابینہ کے اجلاس میں مختلف مقامی امور پر بھی بحث کی گئی جن میں مجلس شوری کی جانب سے پیش کی گئی سفارشات بھی شامل تھیں بعدازاں مختلف نوعیت کے فیصلے کیے گئے جن میں اہم عہدوں پر تقرری اور ترقی کے احکامات شامل تھے۔ کابینہ میں مختلف وزارتوں کو مختلف ممالک کے ساتھ باہمی مفاہمتی یادداشتوں پردستخط اور تعاون کرنے کی بھی منظوری جاری کی ۔
