آریان خان اپنے والد کی طرح محنتی ہیں: اداکار منوج پاہوا

بالی وُڈ کے اداکار منوج پاہوا نے انکشاف کیا ہے کہ شاہ رخ خان کے بیٹے آریان خان اپنے والد کی طرح محنتی ہیں۔

ہندوستان ٹائمز کے مطابق آریان خان ویب سیریز ’سٹارڈم‘ کے ذریعے بطور ہدایت کار اپنا ڈیبیو کرنے والے ہیں۔

اس ویب سیریز کی مرکزی کاسٹ میں منوج پاہوا بھی شامل ہیں۔

اپنے حالیہ انٹرویو میں منوج پاہوا نے ویب سیریز کے دوران آریان خان کے ساتھ کام کرنے کے تجربے کے بارے میں بات کی اور اُن کی شاہ رخ خان سے ملنے والی عادات کا ذکر کیا۔

منوج پاہوا کہتے ہیں کہ ’آریان نوجوان اور محنتی ہیں۔ اس سیریز کی شوٹنگ کے مراحل بہت لمبے تھے لیکن اس دوران بہت مزہ آیا۔‘

انہوں نے مزید کہا کہ ’مجھے علم ہے کہ اگر ضرورت ہو تو شاہ رخ خان ایک دن میں 18 سے 20 گھنٹے تک کام کرتے ہیں۔ وہ بہت محنتی ہیں اور میں نے یہی چیز آریان میں بھی دیکھی ہے۔‘

انہوں نے مزید کہا کہ ’شاہ رخ خان پیار اور عزت کرنے والے ہیں۔ اُن سے مل کر یوں محسوس ہوتا ہے جیسے وہ آپ کو بہت عرصے سے جانتے ہیں۔ اگر آپ اُن کے دفتر جائیں تو وہ آپ کو گیٹ تک رخصت کرنے آئیں گے۔‘

اداکار نے مزید بتایا کہ ’ایک دن میں نے منت (شاہ رخ خان کے گھر) سے آریان کا کھانا آتے دیکھا تو میں نے کہا مجھے بھی کھانا ہے۔ اس کے بعد آریان میرے لیے بھی کھانا منگواتے رہے۔ میں سیما کو بتاتا تھا کہ میں نے شاہ رخ خان کے گھر سے کھایا ہے۔‘

خیال رہے کہ ویب سیریز سٹارڈم کو شاہ رخ خان اور اُن کی اہلیہ گوری خان کے پروڈکشن ہاؤس ریڈ چلیز انٹرٹینمنٹ نے پروڈیوس کیا ہے۔

اس سیریز کی کاسٹ میں سنی دیول اور مونا سنگھ بھی شامل ہیں۔