طیاروں کی ریاض منتقلی، بہترین تصاویر اور وڈیوز پر قیمتی گاڑیاں کس کس نے جیتیں؟

سعودی انٹرٹینمنٹ اتھارٹی کے سربراہ ترکی آل الشیخ  نے السعودیہ کے پرانے طیاروں کی جدہ سے ریاض منتقلی کے دوران بنائی جانے والی بہترین تصاویر اور وڈیو کا اعلان کیا ہے۔

ترکی آل الشیخ نے اپنے ایکس اکاونٹ پر ایک معمر خاتون کو یہ کہتے ہوئے مبارک باد دی کہ ’ والدہ آپ کو مبارک ہو، آپ انعام کی مستحق ہیں، اب تین گاڑیاں رہ گئی ہیں‘۔

یاد رہے کہ السعودیہ کے تین پرانے طیاروں کو جدہ سے ریاض منتقل کیا جا رہا ہے جہاں انہیں ریاض سیزن بولیورڈ رن وے زون میں رکھا جائے گا۔ پرانے طیاروں میں ریسٹورانٹ اور کافی شاپس وغیرہ بنائی جائیں گی۔

طیاروں کی جدہ سے ریاض منتقلی کےلیے خصوصی انتظامات کیے گئے ہیں جس کے لیے خصوصی ٹرالرز پر جہاز کی باڈی کو لادا گیا ہے۔یہ کاررواں جدہ سے براستہ قصیم ریاض پہنچا۔

جدہ سے ریاض کے راستے میں طیاروں کے کاررواں کا لوگوں نے استقبال کیا۔  بعض اہل علاقہ کی جانب سے طیاروں کو لے جانے والے عملے کے اعزاز میں دعوت بھی کی گئی۔

طیاروں کو ریاض منتقل کرنے کے مراحل کے حوالے سے ترکی آل الشیخ نے سعودی شہریوں کے لیے اپنے پیغام میں کہا تھا کہ اس سفر کی بہترین تصویر یا وڈیو جو بنائیں مجھے شیئرکریں۔

بہترین تصویر یا وڈیو بنانے والے سعودی شہریوں کو قیمتی گاڑی انعام میں دی جائے گی۔

ترکی آل الشیخ کی جانب سے بہترین تصویر یا وڈیوز پر 10 قیمتی گاڑیاں انعام میں رکھی گئی ہیں ۔ سنیچر تک 7 گاڑیاں جیتنے والوں کا اعلان کیا جا چکا ہے۔