الباحہ کے انار جو اپنے رنگ، سائز اور ذائقے میں منفرد ہیں

جنوبی سعودی عرب میں الباحہ ریجن کے کاشتکار ان دنوں انار کی کٹائی کررہے ہیں۔

ایس پی اے کے مطابق الباحہ کے انار اپنے رنگ، سائز اور ذائقے میں منفرد ہیں۔ الباحہ میں انار کے درخت سیکڑوں برس سے لگائے جا رہے ہیں جو مقامی کاشتکاروں کےلیے آمدنی کے قدیم ترین ذرائع میں سے ایک ہے۔

 انار کے درخت کا ساتھ کسان کا تعلق زندگی بھر کے سفر جیسا ہے۔ یہ درخت 15 سے 20 سال کے درمیان بھرپور پیداوار تک پہنچتے ہیں اور 70 سال یا اس سے زیادہ پھل دے سکتے ہیں۔

اس علاقے میں تقریبا 179 ہیکٹر رقبے پر انار کے باغات ہیں جو اپنی زرخیز زمین، معتدل آب وہوا، وافر پانی کی فراہمی کے باعث سالانہ 1600 ٹن سے زیادہ انارپیدا کرتے ہیں۔

وزارت ماحولیات، پانی و زراعت نے یہاں مختلف منصوبوں میں سے ایک ’انار کا شہر‘ کے منصوبے پر سرمایہ کاری شروع کی ہے۔ یہ مملکت کے وژن 2030 کے مطابق ہے۔ الباحہ کا انار سب سے زیادہ مشہور ہے اور اس کی کاشت نسل درنسل منتقل ہورہی ہے۔

الباحہ کے مقامی کسان سعود بن حسن الزھرانی کا کہنا ہے انار کا سیزن ہر سال ستمبر میں شروع ہوتا ہے اور تقریبا 3 ماہ تک رہتا ہے۔ انہوں نے بارش اور سازگار حالات کا حوالہ دیتے ہوئے کہا اس سال اچھی پیداوار کی امید ظاہر کی۔

انہوں نے ’الباحہ نیشنل انار فیسٹیول‘ کا بھی ذکر کیا جس کا مقصد نئے مارکیٹنگ چینل کھول کر اور مقامی و عالمی سطح پر مصنوعات کو فروغ دینا ہے تاکہ کاشتکاروں کی مدد کی جا سکے۔

واٹس ایپ پر سعودی عرب کی خبروں کے لیے ”اردو نیوز“ گروپ جوائن کریں