سعودی ولی عہد کی برسلز میں یورپی، خلیجی سمٹ میں شرکت

سعودی ولی عہد و وزیراعظم شہزادہ محمد بن سلمان نے بدھ کو برسلز میں یورپی، خلیجی سربراہی اجلاس میں شرکت کی ہے۔

الاخباریہ کے مطابق شاہ سلمان بن عبدالعزیز کی ہدایت پر ولی عہد شہزادہ محمد بن سلمان سمٹ میں سعودی وفد کی سربراہی کر رہے ہیں۔

سربراہی اجلاس کا مقصد مشرق وسطی میں بڑھتی ہوئی کشیدگی کو روکنا ہے۔

اجلاس میں شرکت کے لیے یورپی ہیڈکوارٹر پہنچنے پر یورپی کونسل کے صدر چارلس مشیل اور یورپی کمیشن کی صدر ارسلا وان ڈرلین نے ولی عہد کا خیرمقدم کیا۔

27 ملکوں پر مشتمل یورپی یونین، خلیج تعاون کونسل( جی سی سی) کے ساتھ مل کر کام کرنے کی کوشش کررہی ہے۔

واضح رہے جی سی سی ممالک میں سعودی عرب، بحرین، کویت، عمان، قطر اور متحدہ عرب امارات شامل ہیں۔

سمٹ کا افتتاح کرتے ہوئے چارلس مشیل نے جی سی سی ملکوں کے ساتھ سٹریٹجک شراکت داری قائم کرنے کےلیے یورپی یونین کی آمادگی کا اظہار کیا اور کہا کہ’ 1989 میں باضابطہ تعلقات کے آغاز کے بعد سربراہان مملکت اور حکومت کی سطح پر پہلا سربراہی اجلاس اتحاد اور امید کا ایک پیغام تھا‘۔

ان کا کہنا تھا’ اس امید کی پہلے سے کہیں زیادہ ضرورت ہے کیونکہ اب مشرق وسطی کی صورتحال سے عالمی استحکام کو خطرہ لاحق ہے‘۔

عرب نیوز کے مطابق یورپی یونین کے سینیئر حکام نے گزشتہ روز ریاض میں ایک اجلاس میں بدھ 16 اکتوبر کو برسلز میں ہونے والی یورپی خلیجی سمٹ کے ایجنڈے پر تبادلہ خیال کیا تھا۔

جی سی سی اور یورپی یونین کے رہنما سربراہی اجلاس کے دوران علاقائی استحکام، تجارت اور عوامی تعاون پر بات کریں گے۔