یوروپا لیگ میچ میں اسرائیلی شائقین کی فلسطین کے حامی مظاہرین سے جھڑپ

میڈیا اور حکام کے مطابق جمعرات کی شب ایمسٹرڈیم کے سٹیڈیم کے باہر یوروپا لیگ فٹ بال میچ سے پہلے اور بعد میں میکبی تل ابیب کلب کے حامیوں کی بظاہر فلسطین حامی مظاہرین سے جھڑپ ہوئی ہے۔

خبر رساں اداروں اے پی اور روئٹرز کے مطابق ایمسٹرڈیم کی میئر فیمکا ہالسیما کی جانب سے فلسطینی حامی مظاہرے پر پابندی کے باوجود جھڑپیں ہوئیں، جنہیں خدشہ تھا کہ مظاہرین اور اسرائیلی فٹ بال کلب کے حامیوں کے درمیان جھڑپیں شروع ہو جائیں گی۔

واقعے کی تفصیلات ابھی واضح نہیں، تاہم اسرائیلی وزیراعظم بنیامین نیتن یاہو کو ایمسٹرڈیم میں اسرائیلی شہریوں پر ہونے والے ’پرتشدد واقعے‘ کی تفصیلات سے آگاہ کر دیا گیا ہے۔

خبر رساں ادارے روئٹرز کے مطابق وزیراعظم کے دفتر نے ایک بیان میں کہا ہے کہ وزیراعظم نیتن یاہو نے شہریوں کی مدد کے لیے فوری طور پر دو ریسکیو طیارے بھیجنے کی ہدایت کی ہے۔

وزیراعظم کے دفتر نے ایک دوسرے بیان میں کہا کہ اسرائیل کی نیشنل سکیورٹی کی وزارت نے بھی ایمسٹرڈیم میں اپنے شہریوں سے حملوں کے بعد اپنے ہوٹل کے کمروں میں رہنے کی تاکید کی ہے۔

اسرائیلی میڈیا کے مطابق وزیراعظم نیتن یاہو نے نیدر لینڈز کے ہم منصب سے ٹیلی فون پر رابطہ بھی کیا۔

اسرائیل کے سکیورٹی کے وزیر اتمار بین گویر نے ایکس پر ایک پوسٹ میں کہا کہ ’جو شائقین  فٹ بال دیکھنے گئے تھے، انہیں یہود دشمنی کا سامنا کرنا پڑا اور ان پر صرف ان کی یہودیت اور اسرائیلیت کی وجہ سے ناقابل تصور ظلم کے ساتھ حملہ کیا گیا۔‘

حملوں کی نوعیت فوری طور پر واضح نہیں ہو سکی ہے۔

نیدر لینڈز کے ہم منصب سے ٹیلیفونک گفتگو میں اسرائیلی وزیر خارجہ نے کہا ہے کہ وہ اسرائیلی شہریوں کو ایئرپورٹ تک بحفاظت پہنچنے میں مدد کرے۔