فیفا ورلڈ کپ 2034 کی میزبانی سعودی عرب کو مل گئی۔ بدھ 11 دسمبر 2024 کو فیفا کے صدر نے اس کا باضابطہ اعلان کیا۔
یہ بھی اعلان کیا گیا کہ ورلڈ کپ 2030 کی میزبانی سپین، پرتگال اور مراکش مشترکہ طور پر کریں گے جس میں ارجنٹائن، پیراگوئے اور یوراگوئے کو بھی میچز ملیں گے۔ سعودی عرب ورلڈ کپ 2034 کی میزبانی کا واحد امیدوار تھا۔
مزید پڑھیں
انٹرنیشنل فیڈریشن آف ایسوسی ایشن فٹبال ( فیفا) کے زیورخ میں ہونے والے اجلاس میں ورلڈ کپ کی میزبانی کے لیے سعودی عرب کے نام کی تصدیق کی گئی۔
فیفا کے صدر نے میزبان ملک کا اعلان کرتے ہوئے کہا’ ریاض میں موجود ہمارے دوستوں کو مبارک ہو۔’
ریاض میں درعیہ اور بلیوارڈ سٹی میں ورلڈ کپ کی میزبانی کا اعلان سننے کے لیے بڑی سکرینیں نصب کی گئی تھیں جہاں ہزاروں افراد اس تاریخی لمحے کے منتظر رہے اور جشن منایا۔
سعودی عرب میزبانی کے اعلان کے تاریخی لمحے کا منتظر تھا اور دنیا کے سب سے بڑے فٹبال ایونٹ کی میزبانی کرنے کے لیے تیار ہے۔
فیفا کے صدر جیانی انفینٹینو نے کہا کہ ’دنیا تنازعات اور جنگوں سے گزر رہی ہے اور صرف فٹبال ہی لوگوں کو اکٹھا کرسکتا ہے۔‘
انہوں نے اس یقین کا اظہار کیا کہ ’ورلڈ کپ 2034 شاندار ہو گا اور تمام فیڈریشنز کے اتفاق رائے پر انہیں خوشی ہے۔ فٹبال ورلڈ کپ سپورٹس کا سب سے بڑا ایونٹ اور تمام لوگوں کے لیے بڑے جشن کا موقع ہے۔‘
’آج ہم فٹبال میں ایک نئے دور کا مشاہدہ کر رہے ہیں اور ورلڈ کپ تمام لوگوں کے اکٹھا ہونے کی جگہ ہے۔‘
#صور_واس#السعودية34 | #أهلا_بالعالم #واس_عام https://t.co/JLBulz5rn1 pic.twitter.com/2Ot9qX7sNV
— واس العام (@SPAregions) December 11, 2024
