فیفا ورلڈ کپ 2034 کی میزبانی ملنے پر سعودی قیادت کو شہباز شریف کی مبارک باد

پاکستان کے وزیراعظم شہباز شریف نے فیفا ورلڈ کپ 2034 کی میزبانی سعودی عرب کو ملنے پر سعودی قیادت کو مبارکباد ہیش کی ہے۔

بدھ کو انہوں نے ایکس پر ایک ٹویٹ میں لکھا کہ ’فیفا ورلڈ کپ 2034 کی میزبانی کا حق جیتنے پر میرے بھائی ولی عہد شہزادہ محمد بن سلمان اور مملکت سعودی عرب کو دلی مبارکباد! یہ تاریخی کامیابی عالمی کھیلوں میں سعودی عرب کے بڑھتے ہوئے اثر و رسوخ اور ویژن 2030 کے لیے اس کی وابستگی کو تسلیم کرنے کے لیے موزوں ہے۔ ایک شاندار ٹورنامنٹ کے منتظر ہیں!‘

فیفا ورلڈ کپ 2034 کی میزبانی سعودی عرب کو مل گئی۔ بدھ 11 دسمبر 2024 کو فیفا کے صدر  نے اس کا باضابطہ اعلان کردیا۔

یہ بھی اعلان کیا گیا کہ ورلڈ کپ 2030 کی میزبانی سپین، پرتگال اور مراکش مشترکہ طور پر کریں گے۔ ورلڈ کپ 2034 کی میزبانی کا واحد امیدوار سعودی عرب تھا۔

انٹرنیشنل فیڈریشن آف ایسوسی ایشن فٹبال( فیفا) کے زیورخ میں ہونے والے غیرمعمولی جنرل اسمبلی اجلاس میں دو ورلڈ کپ کی میزبانی کے لیے ممالک کے ناموں کا اعلان کیا گیا۔

ریاض میں درعیہ اور بلیو ارڈ سٹی میں ورلڈ کپ کی میزبانی کا اعلان سننے کےلیے بڑی سکرینیں نصب تھیں جہاں ہزاروں افراد اس تاریخی لمحے کے منتظر رہے۔

سعودی عرب میزبانی کے اعلان کے تاریخی لمحے کا منتظر تھا اور دنیا کے سب سے بڑے فٹبال ایونٹ کی میزبانی کرنے کے لیے تیار ہے۔

فیفا کے صدر جیانی انفینٹینونے کہا ’دنیا تنازعات اور جنگوں سے گزر رہی ہے لیکن صرف فٹبال ہی لوگوں کو اکٹھا کرسکتی ہے۔‘

انہوں نے اس یقین کا اظہار کیا کہ’ ورلڈ کپ 2034 شاندار ہو گا اور تمام فیڈریشنز کے اتفاق رائے پرخوشی ہے۔ فٹبال ورلڈ کپ سپورٹس کا سب سے بڑا ایونٹ اور تمام لوگوں کے لیے بڑے جشن کا موقع ہے۔‘

’آج ہم فٹبال میں ایک نئے دور کا مشاہدہ کر رہے ہیں اور ورلڈ کپ تمام لوگوں کے اکھٹے ہونے کی جگہ ہے۔‘