سعودی پروجیکٹ کے تحت یمن سے مزید ایک ہزار 654 باردودی سرنگیں صاف

سعودی عرب کے مسام پروجیکٹ نے گزشتہ ہفتے یمن میں حوثیوں کی نصب کردہ مزید ایک ہزار 654 بارودی سرنگوں کو صاف کیا ہے۔

عرب نیوز نے ایس پی اے کے حوالے سے بتایا شاہ سلمان مرکز کی نگرانی میں مسام پروجیکٹ کی خصوصی ٹیموں نے مختلف علاقوں سے 7 اینٹی پرسنل بارودی سرنگیں، ایک ہزار534 بغیر دھماکے کی ڈیوائسز، 104 اینٹی ٹینک بارودی سرنگیں صاف کی ہیں۔

مارب، عدن، الجوف، شبوۃ، تعز، الحدیدہ، لحج، صنعا، البیضا، صعدہ اور الضالع میں بارودی سرنگوں کو ناکارہ بنایا گیا۔

پروجیکٹ کے منیجنگ ڈائریکٹر اسامہ القصبی کے مطابق 2018 میں مسام پروجیکٹ کے آغاز سے اب تک یمن میں حوثیوں کی بچھائی گئی چارلاکھ 72 ہزار688 بارودی سرنگوں کو تباہ کیا جا چکا ہے۔

حوثیوں کی جانب سے یمن بھر میں نصب کی جانے والی بارودی سرنگوں سے بچوں، خواتین اور معمرافراد سمیت معصوم شہریوں کی زندگیوں کو شدید خطرہ لاحق ہے۔

واضح رہے کہ حوثی باغیوں کی جانب سے 1.2 ملین سے زیادہ بارودی سرنگیں بچھائی گئی ہیں جس کے باعث سیکڑوں معصوم شہریوں کے زخمی اور ہلاک ہونے کے واقعات رونما ہوئے ہیں۔

مسام پروجیکٹ کا مقصد یمن کے مختلف شہری اور دیہی علاقوں سے بارودی سرنگوں کی صفائی کرنا ہے تاکہ معصوم شہریوں کی جانوں کو ان سے محفوظ کیا جا سکے۔

یہ پروجیکٹ مقامی ڈی مائننگ انجینیئروں کو تربیت اور جدید ڈیوائسز کی فراہمی کے ساتھ باردودی سرنگ کی زد میں آکر زخمی ہونے والے یمنی شہریوں کو بھی مدد فراہم کرتا ہے۔

یمن میں بحران کے آغاز سے اب تک تقریبا 50 لاکھ افراد نقل مکانی پر مجبور ہوئے جن میں بیشتر بارودی سرنگوں کے باعث بے گھر ہوئے۔