سعودی شوریٰ کونسل کے چیئرمین ڈاکٹر عبداللہ بن محمد بن ابراہیم آل الشیخ سے سپیکر قومی اسمبلی کی ملاقات

سعودی شوریٰ کونسل کے چیئرمین ڈاکٹر عبداللہ بن محمد بن ابراہیم آل الشیخ اور سپیکر قومی اسمبلی سردار ایاز صادق کے درمیان پارلیمنٹ ہاؤس میں ملاقات ہوئی ہے۔

بدھ کو شوریٰ کونسل کے چیئرمین ڈاکٹر عبداللہ بن محمد بن ابراہیم آل الشیخ جب پارلیمانی وفد کے ہمراہ پارلیمنٹ ہاؤس پہنچے، تو سپیکر قومی اسمبلی سردار ایاز صادق نے ان کا خیرمقدم کیا۔  

قومی اسمبلی سیکریٹریٹ کے بیان کے مطابق ملاقات میں دونوں برادر ممالک کے درمیان تعلقات کو مزید مستحکم کرنے اور پارلیمانی روابط کو فروغ دینے پر تبادلہ خیال ہوا۔

سپیکر قومی اسمبلی سردار ایاز صادق نے کہا کہ پاکستان کو سعودی عرب کے ساتھ اپنی بے مثال دوستی پر فخر ہے۔

’سعودی عرب ہمیشہ پاکستان کے ساتھ بڑے بھائیوں کی طرح کھڑا رہا ہے۔ دونوں برادر ممالک نے ہر مشکل وقت میں ایک دوسرے کا ساتھ دیا ہے۔‘

سپیکر قومی اسمبلی سردار ایاز صادق نے سعودی عرب کی قیادت اور عوام کے لیے نیک خواہشات کا اظہار کیا۔  

’پاکستان اور سعودی عرب کے مابین تعلقات باہمی اعتماد و احترام پر مبنی ہیں۔ دونوں بردار ممالک مذہب، ثقافت اور تاریخ کے اٹوٹ رشتوں میں بندھے ہوئے ہیں۔‘

انہوں نے کہا کہ ’پارلیمانی رابطوں میں اضافہ دوطرفہ تعلقات کو مزید وسعت دینے میں انتہائی اہمیت کا حامل ہے۔ دونوں برادر ممالک اہم علاقائی و عالمی ایشوز پر یکساں موقف رکھتے ہیں۔‘

سردار ایاز صدیق کا کہنا تھا کہ سعودی شوریٰ کونسل کے چیئرمین کا حالیہ دورۂ پاکستان دونوں ممالک کی پارلیمانوں میں تعاون کو فروغ دینے میں اہم سنگ میل ثابت ہو گا۔

’ پاکستان کی پارلیمان سعودی عرب کی شوریٰ کونسل کے ساتھ اپنے مفاہمتی یادداشتوں کو عملی جامہ پہنانا چاہتی ہے۔‘

سعودی شوریٰ کونسل کے چیئرمین ڈاکٹر عبداللہ بن محمد بن ابراہیم آل الشیخ نے پرتپاک استقبال پر سپیکر قومی اسمبلی کا شکریہ ادا کیا۔

سعودی شوریٰ کونسل کے چیئرمین نے دونوں ممالک کے تعلقات کو مضبوط بنانے میں پاکستانی پارلیمان کے کردار کو سراہا۔

’دونوں ممالک کے درمیان پارلیمانی، اقتصادی، تجارتی اور تعلیمی شعبوں میں تعاون میں اضافہ دونوں ممالک کے عوام کے بہترین مفاد میں ہے۔‘

چیئرمین سعودی شوریٰ کونسل نے مسلم امہ کو درپیش چیلنجز کے حل کے لیے مشترکہ کوششوں کی ضرورت پر زور دیتے ہوئے کہا کہ ’مسلم دنیا کو درپیش مسائل کے حل کے لیے اتحاد و یکجہتی کو فروغ دینا وقت کی اہم ضرورت ہے۔

سعودی شوریٰ کونسل کے چیئرمین نے پارلیمانی وفود کے تبادلوں میں اضافے اور دو طرفہ تعاون کو مزید وسعت دینے کے عزم کا اعادہ کیا۔

اسد قیصر کی ڈاکٹر عبداللہ بن محمد بن ابراہیم الشیخ سے ملاقات

سعودی عرب کی شوریٰ کونسل کے چیئرمین ڈاکٹر عبداللہ بن محمد بن ابراہیم الشیخ سے سابق سپیکر قومی اسمبلی اسد قیصر نے ملاقات کی۔

اس موقعے پر سابق سپیکر اسد قیصر نے سعودی شوریٰ کونسل کے چیئرمین اور ان کے وفد کو پاکستان آمد پر خوش آمدید کہا۔

اسد قیصر کا کہنا تھا کہ ’پاکستان تحریک انصاف اور پاکستانی عوام حرمین الشریفین اور سعودی عوام کے لیے دلوں میں احترام رکھتے ہیں۔‘

انہوں نے مزید کہا کہ ’سعودی عرب کے ساتھ ہمارے برادرانہ تعلقات ہیں۔‘

اسد قیصر نے عمران خان کی سعودی عرب کے عوام اور ولی عہد شہزادہ محمد بن سلمان کے لیے نیک خواہشات کا پیغام پہنچایا۔

اسد قیصر نے چیئرمین سعودی شوریٰ کونسل کو خیبر پختونخوا کے دورے کی دعوت دی جو انہوں نے قبول کرلی۔