حج پروازوں کے لیے وزارت مذہبی امور اور سعودی ایئرلائن کے درمیان معاہدہ

پاکستان کی وزارت مذہبی امور کا کہنا ہے کہ حج پروازوں کے لیے وزارت مذہبی امور اور سعودی ایئرلائن کے مابین معاہدہ طے پا گیا ہے۔

وزارت مذہبی امور کی جانب سے جاری بیان کے مطابق معاہدے کے تحت سعودی ایئرلائن 35 ہزار پاکستانی سرکاری حجاج کو سفری سہولیات مہیا کرے گی۔

معاہدے پر دستخط وزارت مذہبی میں سعودی ایئرلائن کے پاکستان میں کنٹری مینیجر سلطان الحربی اور ایڈیشنل سیکرٹری مذہبی امور ڈاکٹر سید عطا الرحمن نے کیے۔

بیان میں کہا گیا ہے کہ سعودی ایئرلائن کے کنٹری مینیجر کا پاکستانی حجاج کو بہترین سہولیات کی فراہمی کے عزم کا اعادہ کیا۔

ڈاکٹر عطاء الرحمن نے کہا کہ پاکستانی حجاج کے لیے بہترین سہولیات کی فراہمی یقینی بنانے کے لیے ہر ممکن اقدامات کر رہے ہیں۔

اس سے قبل 35 ہزار حجاج کو سفری سہولیات کی فراہمی کے لیے قومی ایئرلائن پی ائی اے کے ساتھ بھی معاہدہ کیا جاچکا ہے۔