جاپان میں سعودی سفیر ایکسپو 2025 اوساکا میں پویلین کے جنرل کمشنر مقرر

جاپان میں سعودی سفیر ڈاکٹر غازی بن زقر کو جاپان کے شہر اوساکا میں اپریل میں شروع ہونے والی ایکسپو 2025 میں مملکت کے پویلین کا جنرل کمشنر مقرر کیا گیا ہے۔

عرب نیوز جاپان ایڈیشن کی رپورٹ کے مطابق ایکسپو 2025 عالمی نمائش میں مملکت کی شرکت کو یقینی بنانے کے لیے سعودی پویلین کی تعمیر اپنے آخری مراحل میں داخل ہو چکی ہے۔

سعودی پریس ایجنسی ایس پی اے نے گذشتہ روز بدھ کو جاری رپورٹ میں کہا ہے’ ڈاکٹر غازی بن زقر 2024 سے جاپان میں سفیر کے طور پر خدمات انجام دے رہے ہیں، اپنی موجودہ ذمہ داریوں کے ساتھ ساتھ جنرل کمشنر کے طور پر نئی ذمہ داریاں بھی نبھائیں گے۔

ڈاکٹر غازی بن زقر نے شوریٰ کونسل کے رکن کے طور پر بھی خدمات انجام دی ہیں اور 2023 سے 2024 تک امور خارجہ کمیٹی کے نائب چیئرمین کے عہدے پر فائز رہے ہیں۔

جاپان میں سعودی سفیر بن زقر سعودی عرب اور جاپان کے مابین تعلقات مضبوط بنانے کے لیے کئے جانے والے حالیہ اقدامات کے نگران ہیں۔

حال ہی میں منعقد کئے جانے والے سعودی-جاپانی بزنس فورم میں بھی حصہ لینے کے ساتھ بن زقر نے توانائی، ٹیکنالوجی، تجارت اور سرمایہ کاری سمیت دیگر اہم شعبوں میں کئے جانے والے مشترکہ اقدامات میں فعال کردار ادا کیا۔

ایکسپو 2025 اوساکا میں مملکت کا پویلین غیرمعمولی تعمیری ڈیزائن کا شاہکار ہے جو پائیدار انسانی ترقی کے لیے بین الاقوامی کوششوں کے لیے اس کے عزم کی عکاسی کرتا ہے۔

سعودی عرب ان اولین ممالک میں شامل تھا جنہوں نے اوسکا میں منعقد ہونے والے ایکسپو 2025 میں شمولیت کے لیے اپنے پویلین کی تعمیر کا آغاز گزشتہ سال فروری میں کیا تھا۔

ایکسپو 2025 اوسکا میں قائم کئے جانے والے سعودی پویلین کا ڈیزائن مملکت کی تاریخ، ثقافت اور موجودہ اقتصادی تبدیلیوں کی عکاسی کرتا ہے۔

جاپان اور سعودی عرب کے مابین رواں سال سفارتی تعلقات کی 70 سال مکمل ہونے پر جاپان سعودی عرب سے تعلقات مزید مضبوط بنانے کے لیے پُرعزم ہے۔