سعودی عرب میں منشیات کیس میں گرفتار خاندان رہا، ڈرگ گینگ کے 9 ملزمان گرفتار

سعودی عرب میں منشیات کیس میں گرفتار خاندان کو رہائی مل گئی ہے اور ایئرپورٹ پر بیگ کے ٹیگ تبدیل کر کے اس فیملی کو پھنسانے والے انٹرنیشنل ڈرگ گینگ کے 9 ملزمان کو گرفتار کر لیا گیا ہے۔

اتوار کو اینٹی نارکوٹکس فورس (اے این ایف) کی طرف سے جاری بیان کے مطابق وزیر داخلہ محسن نقوی کی خصوصی ہدایت پر اے این ایف ٹیم کی کاوشوں سے خاندان کے 5 افراد واپس وطن آ گئے ہیں۔

وفاقی وزیرداخلہ و انسداد منشیات محسن نقوی منشیات کیس سے رہائی پانے والے بے گناہ خاندان کی رہائش گاہ  پر پہنچے اور خاندان کے افراد سے ملاقات کی۔

انہوں نے کہا کہ ’آپ کو جو تکلیف اٹھانا پڑی وہ الفاظ میں بیان نہیں کی جا سکتی۔ اے این ایف نے دن رات محنت کر کے انٹرنیشنل گینگ کا سراغ لگایا اور  اصل ملزمان کو گرفتار کیا۔‘

محسن نقوی نے کہا کہ سعودی عرب کی حکومت نے بھی بہت تعاون کیا۔ سعودی حکومت کا خصوصا شکریہ ادا کرتا ہوں۔

متاثرہ خاندان کے ماموں ملک ارشد  نے کہا کہ ’ہم آپ اور اے این ایف کی ٹیم کے شکر گزار ہیں۔‘

متاثرہ شخص ہارون علی کا کہنا تھا کہ ’محسن نقوی اور اے این ایف کے ڈی جی میجر جنرل عبدالمعید نے جو کام کیا وہ الفاظ میں بیان نہیں کر سکتے۔‘

اے این ایف کے مطابق لاہور کے علاقے مرغزار کالونی کی رہائشی فرحانہ اکرم چار فیملی ممبرز کے ساتھ 23 دسمبر کو سعودی عرب گئیں۔ ڈرگ مافیا نے عملے کی ملی بھگت سے فرحانہ اکرم کے بیگ کا ٹیگ تبدیل کیا۔

’فرحانہ اکرم اور ان کے فیملی ممبرز کو 30 دسمبر کو سعودی عرب میں حراست لیا گیا۔ اے این ایف نے کیمروں کی مدد سے تمام انٹری اور ایگزٹ پوائنٹس کا جائزہ لیا۔ ایک پورٹر کو حراست میں لے کر تفتیش کی گئی تو پورا گینگ بے نقاب ہوا۔‘

مزید کہا گیا کہ ’انٹرنیشنل ڈرگ  گینگ کے سرغنہ سمیت 9 ملزمان کو گرفتار کر لیا گیا ہے۔ اے این ایف نے تمام شواہد سعودی حکام کو دئیے جس پر متاثرہ خاندان کی رہائی ممکن ہوئی۔‘