سعودی آرامکو کا 2024 میں 398 بلین ریال منافع کا اعلان

سعودی آرامکو نے 2024 کے مالی نتائج کا اعلان کیا ہے جس میں منافع میں 12.4 فیصد کمی دیکھنے میں آئی جو 398.42 بلین ریال تک پہنچ گیا جبکہ 2023 میں یہ 454.7 بلین ریال تھا۔

سبق ویب سائٹ کے مطابق منافع میں کمی کی بنیادی وجہ آمدنی اور فروخت میں کمی اور آپریٹنگ اخراجات میں اضافہ ہے۔

گزشتہ سال سعودی آرامکو کی مجموعی آمدنی 1637 بلین ریال سے تجاوز کر گئی تھی جو 2023 میں 1653.28 بلین ریال کے مقابلے میں تقریباًایک فیصد کی معمولی کمی کو ظاہر کرتی ہے۔

یہ کمی بنیادی طور پر خام تیل کی قیمتوں اور فروخت شدہ مقدار میں کمی کے علاوہ، ریفائنڈ اور کیمیکل مصنوعات کی قیمتوں میں کمی کی وجہ سے ہوئی تاہم اس کا کچھ حد تک ازالہ ریفائنڈ اور کیمیکل مصنوعات کی فروخت شدہ مقدار میں اضافے سے ہوا۔

2024 کی چوتھی سہ ماہی میں خالص آمدنی تجزیہ کاروں کی توقعات کے مطابق رہی حالانکہ اس میں تقریباً 6.5 بلین ریال کی دیگر غیر نقدی فیسیں شامل تھیں۔

سعودی آرامکو نے 2024 کی چوتھی سہ ماہی کے لیے حصص یافتگان کو بنیادی منافع تقسیم کرنے کا اعلان کیا جو تیسری سہ ماہی کے مقابلے میں 4.2فیصد زیادہ ہے۔

یہ کمپنی کی پالیسی کے مطابق ہےجو پائیدار اور بڑھتے ہوئے منافع کی تقسیم کو یقینی بناتی ہے۔

اس کے علاوہ، کمپنی نے 2024 کے مکمل سالانہ نتائج کی بنیاد پر حصص یافتگان کے لیے پرفارمنس سے منسلک پہلے منافع کی تقسیم کا اعلان کیا۔

 یہ منافع سعودی آرامکو کے 2024 کے فری کیش فلو کا 70 فیصد بنیاد بنا کر حساب کیا گیا جس میں سے بنیادی منافع اور دیگر اخراجات بشمول بیرونی سرمایہ کاری منہا کئے گئے۔

کل تقسیم شدہ رقم 80.10 بلین ریال ہے، جس میں بنیادی منافع کی رقم 79.28 بلین ریال اور پرفارمنس سے منسلک منافع کی رقم 82 ملین ریال شامل ہے۔