جیکی چن نے طیارہ خرید لیا

    بیجنگ ..... ویسے تو ہوا میں اڑنے کا شوق کس کو نہیں ہوتا مگر اس کےلئے 2 ارب روپے خرچ کرنے کی سکت ہر ایک کے بس کی بات نہیں، کیا آپ ایسا کرسکتے ہیں؟کم از کم چین سے تعلق رکھنے والے سپراسٹار اداکار جیکی چن نے تو ایسا نیا کھلونا اپنے ذخیرے کا حصہ بنالیا ہے۔ گزشتہ دنوں چینی اور ہالی وڈ فلموں کے اس سپراسٹار نے برازیل کی طیارہ ساز کمپنی ایمبرایئر سے ایک اور جہاز 20 ملین ڈالرز (لگ بھگ 2 ارب 10 کروڑ پاکستانی روپے) میں خرید لیا ہے۔یہ برازیلین کمپنی کا رواں سال متعارف کرائے جانے والا جہاز ہے جسے لیگسی 500 بزنس جیٹ کا نام دیا گیا ہے۔ایمبرایر لیگسی 500 بزنس جیٹ نامی یہ طیارہ جیکی چن کا پہلا جہاز نہیں۔درحقیقت وہ اس کمپنی کے برانڈ ایمبسیڈر ہیں اور اس سے پہلے 2012 اور رواں سال کے شروع میں میں بھی طیارے خرید چکے ہیں۔کمپنی کا کہنا ہے کہ لیگسی 500 جدید ترین ٹیکنالوجی سے لیس ہے اور اس کا ڈیزائن مسافروں کے آرام کو مدنظر رکھ کر تیار کیا گیا ہے۔جیکی چن اپنے طیاروں کے ذخیرے میں نئے اضافے پر بہت پرجوش ہیں اور ان کا کہنا ہے کہ وہ لیگسی 500 جیسے طیارے کے حصول پر سنسنی محسوس کررہے ہیں جو کہ اسٹیٹ آف دی آرٹ ایگزیکٹو جیٹ ہے۔