فرانس اور برطانیہ میں 2040ء تک ڈیزل اور پٹرول گاڑیوں پر پابندی لگا دینگے
جمعرات 27 جولائی 2017 3:00
لندن ----- فرانس کے بعدبرطانوی حکومت نے بھی فضائی آلودگی کا مقابلہ کرنے کیلئے 2040ء تک برطانیہ میں پٹرول اور ڈیزل سے چلنے والی گاڑیوں پر پابندی کا اعلان کرنے جارہی ہے۔برطانوی نشریاتی ادارے کے مطابق حکومت ساڑھے 25 کروڑ پاؤنڈ کا ایک منصوبہ شروع کرنے جا رہی ہے جس کے تحت کونسلوں کو ڈیزل گاڑیوں سے پیدا ہونے والی فضائی آلودگی سے نمٹنے میں مدد فراہم کی جائیگی۔حکومت بعد میں صاف ہوا کی حکمتِ عملی کا بھی اعلان کریگی۔حکومت کا کہنا ہے کہ یہ اقدامات حوصلہ افزا ہیں لیکن ان کی تفصیلات کی ضرورت ہے۔ واضح رہے کہ حکومت کو عدالتوں نے حکم دیا تھا کہ وہ آلودگی پیدا کرنے والی خطرناک گیس نائٹریٹ آکسائیڈ کی مقدار پر قابو پانے کیلئے منصوبہ تیار کریں۔مقامی اقدامات میں بسوں میں تبدیلی کر کے انھیں زیادہ ماحول دوست بنانا، سڑکوں کے نقشے تبدیل کرنا،ا سپیڈ بریکروں کو بدلنا اور ٹریفک کے اشاروں میں ایسی تبدیلیاں لانا کہ ٹریفک کا بہاؤ زیادہ ہموار ہو جائے، شامل ہیں۔آلودگی کیخلاف کام کرنے والے کارکن چاہتے ہیں کہ حکومت ایسے ایئر زون قائم کرے جہاں آلودگی پیدا کرنے والی گاڑیوں پر جرمانے عائد کیے جا سکیںتاہم حکومت کو خدشہ ہے کہ کہیں ایسا نہ لگے کہ وہ ڈیزل گاڑیوں کے مالکان کو سزا دینا چاہتی ہے جنھوں نے اپنی گاڑیاں گزشتہ لیبر حکومت کی اس شہ پر خریدی تھیں کہ وہ کم کاربن خارج کرتی ہیں۔ واضح ہو کہ برطانوی حکومت کا یہ اعلان ایسے ماحول میں کیا جا رہا ہے جب دنیا بھر میں بجلی سے چلنے والی کاروں کا رجحان بڑھ رہا ہے۔ گزشہ ہفتے فرانسیسی صدر نے ایسے ہی ایک منصوبے کا اعلان کیا تھا جس کے تحت فرانس سے 2040ء تک معدنی ایندھن سے چلنے والی گاڑیوں پر پابندی لگا دی جائے گی۔
