مسجد کے مینار اسلامی فن تعمیر کی اہم علامتوں میں سے ایک ہیں، ان کے ڈیزائن مختلف ہوتے ہیں۔ مکہ مکرمہ کی مسجد الحرام کے مینار خاص اہیمت کے حامل ہیں۔
مسجد الحرام میں تیسری سعودی توسیع کے بعد اس کے میناروں کی مجموعی تعداد 13 ہوگئی ہے۔ یہ مینار اسلامی فن تعمیر کا شاہکار ہیں۔
حرمین شریفین جنرل پریذیڈنسی کے مطابق مسجد الحرام کے 13 مینار ہیں، ان سب کے ڈیزائن ایک جیسے ہیں لیکن یہ اونچائی میں مختلف ہیں۔
ان میں باب العمرہ پر 2 مینار ہیں، ہر ایک کی لمبائی 137 میٹر ہے۔ باب ملک عبدالعزیز پر دو مینار 137 میٹر طویل ہیں۔ اس کے علاوہ باب شاہ فہد پر 2 مینار ہیں، ہرایک کی لمبائی 98 میٹر ہے۔
باب صفا پر ایک مینار 98 میٹر اونچا ہے۔ اسی طرح باب الفتح پر 2 مینار 137 میٹر بلند ہیں۔
نئی سعودی توسیع والے حصے میں چار مینار ہیں اور ان میں ہر ایک کی لمبائی 135 میٹر ہے۔
مسجد الحرام کے ہر مینار کو پانچ حصوں میں تقسیم کیا گیا ہے۔ تمام میناروں پر اسلامی دور میں مختلف شکلوں میں بنائے گئے ہلال ہیں۔ ان کا رنگ سنہرا ہے جو اس کی خوبصورتی میں اضافہ کرتے ہیں۔
واضح رہے مسجد الحرام کے میناروں میں نصب کیے جانے والے سنہرے ہلال کاربن فائبر سے تیار کردہ ہیں جو موسمی اثرات کو برداشت کرنے کی صلاحیت رکھتے ہیں۔
