پاکستانی ٹیسٹ ا سکواڈ کا اعلان

لاہور:سری لنکا کے خلاف 2ٹیسٹ میچوں کی سیریز کےلئے 16رکنی پاکستانی اسکواڈ کا اعلان کردیا گیا ہے اور یاسر شاہ فٹنس مسائل کے باوجود بھی ٹیم میں شامل ہیں۔سرفراز احمد پہلی بار ٹیسٹ ٹیم کی قیادت کریں گے۔کراچی سے تعلق رکھنے والے 25 سالہ لیفٹ آرم فاسٹ بولر میرحمزہ پہلی بار پاکستانی ٹیم میں جگہ بنانے میں کامیاب ہوئے ہیں۔ میر حمزہ کے علاوہ محمد اصغر، حارث سہیل، عثمان صلاح الدین اور بلال آصف بھی ایسے کرکٹر ہیں جو ٹیسٹ کرکٹ نہیں کھیلے البتہ حارث سہیل، عثمان صلاح الدین اور بلال آصف محدود اوورز کی انٹرنیشنل کرکٹ کھیل چکے ہیں۔انضمام الحق کی سربراہی میں قائم سلیکشن کمیٹی نے قومی کیمپ کے 18کھلاڑیوں میں شامل محمد رضوان اور احمد شہزاد کو ڈراپ کرتے ہوئے بقیہ 16 کھلاڑیوں کو ٹیم میں شامل کرنے کا فیصلہ کیا ہے۔پاکستان کرکٹ بورڈ کو اوپنر اظہر علی اور لیگ اسپنر یاسر شاہ کی فٹنس سے خاصی فکر لاحق ہے تاہم یہ دونوں ٹیم میں جگہ بنانے میں کامیاب ہوگئے ہیں۔اظہر علی کے گھٹنے میں تکلیف ہے جبکہ یاسر شاہ کیمپ میں ٹریننگ کے دوران مکمل طور پر فٹ نہیں پائے گئے تھے۔پاکستانی ٹیم ان کھلاڑیوں پر مشتمل ہے۔ سرفراز احمد ( کپتان )، اظہرعلی، شان مسعود، سمیع اسلم، بابراعظم، اسد شفیق، حارث سہیل، عثمان صلاح الدین، یاسرشاہ، محمد اصغر، بلال آصف، میرحمزہ، محمد عامر، حسن علی، محمد عباس اور وہاب ریاض۔پاکستان اور سری لنکا کے درمیان پہلا ٹیسٹ 28 ستمبر سے ابوظبی میں کھیلا جائے گا جبکہ دبئی 6 اکتوبر سے دوسرے ٹیسٹ کی میزبانی کرے گا۔