جے پور: کسانوں کاانوکھا احتجاج

جے پور۔۔۔۔۔۔ راجستھان کی راجدھانی جے پور میں کسانوں نے اپنی زمین بچانے کے لئے تحریک چلارکھی ہے۔ انہوں نےگاندھی جینتی(گاندھی کی جی یوم پیدائش) پر احتجاج کا انوکھا طریقہ اختیار کیا،وہ گڈھا کھود کر اس کے اندر کھڑے ہو گئے۔ کسانوں نے اسے’’ سمادھی ستیاگرہ ‘‘کا نام دیا ہے۔اس تحریک میں 21 کسانوں نے حصہ لیا۔ وہ جب گڈھے  میں کھڑے ہوئے تو صرف گردنیں نظرآرہی تھیں۔کسانوں کا کہنا ہےزمین ہماری ہے اورہم اس پر فصلیں اگاتے ہیں، جے پور ڈیولپمنٹ اتھارٹی (جے ڈی اے ) کواس پر قبضہ کرنے نہیں دینگے۔انہوں نے انتباہ دیا کہ اگر جے ڈی اے نے زبردستی زمین لینے کی کوشش کی تو اسے ان کی لاشوں سے  گزرنا ہوگا۔ جے ڈی اے نے جے پور کے نیندڑ گاؤں کی 1300 بیگھہ زمین کو ایکوائر کرنے کا فیصلہ کیا تھا جس کے خلاف کسانوں نے احتجاجی مظاہرہ شروع کررکھا ہے۔کسانوں نے گزشتہ 15 دنوں سے دودھ اور سبزیوں کی سپلائی بند کررکھی ہے ، آج گاندھی جینتی  کے موقع پر21 کسانوں نے گڈھوں میں کھڑے ہوکر انوکھے انداز میں احتجاجی مظاہرہ کیا ۔