سکھر...قومی اسمبلی میں قائد حزب اختلاف خورشید شاہ نے امریکی صدر ڈونلڈ ٹرمپ کے مقبوضہ بیت المقدس کو اسرائیل کا دارالحکومت تسلیم کر نے کے فیصلے کی شدید مذمت کرتے ہوئے کہا ہے کہ ٹرمپ کے فیصلے پر دنیا تنقید کررہی ہے۔عالم اسلام کو سازشوں کے تناظر میں متحد ہونا پڑے گا۔ ہفتہ کو سکھر میں تقریب سے خطاب کرتے ہوئے انہوں نے کہا کہ مسلمان دنیاکے جس کونے میں ہوں ایک جسم کی مانند ہیں۔ انہوں نے کہا کہ صرف باتوں سے مسائل حل نہیں ہوں گے۔قبلہ اول کو سازش کے تحت یرغمال بنانے کی کوشش کی گئی۔مسلمانوں کو ایک طرف دھکیلنا دنیا کیلئے خطرناک ہو گا۔ ایک دوسرے کے مذاہب کے احترام سے ہی دنیا میں امن قائم ہو گا۔ ڈونلڈ ٹرمپ حادثاتی طور پر امریکی صدر بنے ہیں۔ عالم اسلام کو آج پھر بھٹو جیسے لیڈر کی ضرورت ہے۔ انہوںنے کہا کہ ذوالفقار علی بھٹو نے 1974ءمیں عالم اسلام کے قائدین کو متحد کیا۔ سعودی عرب اور پاکستان سمیت اسلامی ممالک کو اپنا کردار ادا کرنا پڑے گا۔ حقیقی جہاد یہی ہے کہ موجودہ حالات میں اسلامی ممالک اپنا کردار ادا کریں۔ انہوں نے کہاکہ دنیا بھر کے میڈیا سے اپیل کرتا ہوں کہ بیت المقدس کے معاملہ پر مثبت کردار ادا کرے۔
