ایکدوسرے پر الزام تراشی نہیں کرینگے،پاک ،افغان اتفاق
اسلام آباد...ترجمان دفترخارجہ نے کہا ہے کہ پاکستان اور افغانستان نے ایک دوسرے کےلئے خطرہ بننے والے عناصر کے خلاف موثر کارروائی پر اتفاق کیا ہے۔وزیراعظم شاہد خاقان عباسی کے دورہ افغانستان کے حوالے سے دفترخارجہ کی جانب سے جاری بیان میں بتایا گیا کہ پاکستان اور افغانستان نے ایکشن پلان فار پیس اینڈ سالیڈیریٹی کے تحت ورکنگ گروپس کو فعال بنانے پر اتفاق کیا ہے۔ پاکستان افغانوں کی زیر قیادت امن و مفاہمت کی حمایت کرے گا۔دفترخارجہ کے مطابق دونوں ممالک نے ایک دوسرے کی جغرافیائی اور فضائی حدود کے احترام پر بھی اتفاق اور اس عزم کا اعادہ کیا کہ ایک دوسرے کے خلاف کسی بھی ملک، نیٹ ورک یا گروپ کو اپنی سرزمین استعمال نہیں کرنے دیں گے بلکہ ایک دوسرے کے لئے خطرہ بننے والے عناصر کے خلاف موثر کارروائی کی جائے گی۔ دونوں ممالک نے ایک دوسرے پر الزام تراشی سے گریز اور اس کے بجائے ایکشن پلان میکنزم کے استعمال پر اتفاق کیا۔
