کرکٹ ٹیم آئرلینڈ ٹیسٹ کیلئے پرعزم

لاہور :دورہ آئرلینڈ اور انگلینڈ کیلئے قومی ٹیسٹ ٹیم کی تیاریاں مکمل ہوگئی ہیں،ٹیسٹ ٹیم آئرلینڈ کوٹیسٹ اسٹیٹس ملنے کے بعد اس سے پہلا ٹیسٹ جیتنے کیلئے پرعزم ہے، ٹیم کی آج رات روانگی ہوگی۔تمام کھلاڑی آئرلینڈ اور انگلینڈ سے مقابلے میں فتح کیلئے پرعزم ہیں۔دورہ آئر لینڈ اور انگلینڈ کیلئے شاہینوں نے کیمپ میں خوب محنت کی ہے ، بیٹنگ کی خامیاں دور کرنے کیلئے بلے بازوں نے تکنیکی باریکیوں پر توجہ دی ہے۔ بولروں نے بھی اپنی صلاحیتوں میں اضافہ کیا، گرین شرٹس نے اپنی فٹنس پر بھی بھرپور کام کیا۔ دوران کیمپ موسم بھی مہربان رہا، ٹھنڈی اور تیز ہواوں میں قومی ا سکواڈ نے لاہور میں انگلینڈ والا موسم انجوائے کیا۔ پہلی بار ٹیسٹ ا سکواڈ میں شامل فہیم اشرف کچھ کر دکھانے کو بے تاب ہیں۔ 16 رکنی ا سکواڈ میں5 کھلاڑی فخر زمان، امام الحق، فہیم اشرف، سعد علی اور عثمان صلاح الدین ٹیسٹ ڈیبو کے امیدوار ہیں۔بیٹنگ میں مضبوط دیوار سمجھے جانے والے بابر اعظم گیارہ میں سے ایک بھی ٹیسٹ انگلینڈ میں نہیں کھیلے۔ اسد شفیق کیرئیر کے58 میں سے4 ٹیسٹ انگلینڈ میں کھیل کر ایک سنچری، ایک نصف سنچری سمیت274 رنز بنا چکے ہیں۔ سرفراز الیون کا آئرش ٹیم سے واحد ٹیسٹ 11 مئی کو شیڈول ہے۔انگلینڈ کے خلاف 2ٹیسٹ میچز کی سیریز 24مئی سے شروع ہوگی۔ ناتجربہ کار قومی ٹیم کو انگلینڈ کا بڑاچیلنج بھی درپیش ہے ۔ کپتان سرفراز احمد کا کہنا ہے کہ انگلینڈ کی کنڈیشنز پاکستان کیلئے ہمیشہ سے مشکل رہی ہیں، تاہم ٹیم اچھا پرفارم کرنے کی کوشش کرے گی۔