دفاعی چیمپیئن ممبئی انڈینز آئی پی ایل سے باہر

دہلی: انڈین پریمیئر لیگ میں دہلی ڈیئر ڈیولز نے دفاعی چیمپیئن ممبئی انڈینز کو آخری میچ میں 11 رنز سے ہرا کر لیگ سے باہر کرتے ہوئے ان کا ٹائٹل کے دفاع کا خواب چکنا چور کردیا۔ممبئی انڈینز نے رواں برس ایونٹ کا آغاز کچھ اچھے انداز میں نہیں کیا اور انہیں ابتداء میں اپنے اکثر میچوں میں شکست کا منہ دیکھنا پڑا تاہم گزشتہ چند میچوں میں ٹیم نے شاندار واپسی کی البتہ اسے پلے آف تک رسائی کے لئے اپنے آخری لیگ میں لازمی فتح درکار تھی۔ آئی پی ایل کے 55ویں میچ میں دہلی ڈیئر ڈیولز نے پہلے کھیلتے ہوئے مقررہ اوورز میں 4 وکٹوں کے نقصان پر 174 رنز بنائے۔ریشابھ پانٹ نے 4 چھکوں کی مدد سے 64 رنز کی دلکش اننگز کھیلی جبکہ وجے شنکر 43 رنز بنا کر ناٹ آوٹ رہے، ان کے علاوہ آسٹریلین گلین میکسویل نے 22 رنز بنائے۔ممبئی انڈینز کی جانب سے کرونل پانڈیا، جسپریت بمراہ اور مارکنڈ نے ایک، ایک وکٹ لی۔جواب میں ممبئی انڈینز کی ٹیم ہدف کے تعاقب میں آخری اوور کی تیسری گیند پر 163 رنز بنا کر آوٹ ہو گئی، ویسٹ انڈیز سے آئے ایون لوئس کی 48 اور بین کٹنگ کی 37 رنز کی جارحانہ اننگز بھی ٹیم کو شکست سے نہ بچا سکیں۔ممبئی انڈینز کے دیگر بڑے اسٹارز ناکامی سے دوچار ہوئے جہاں ہردک پانڈیا 27، کپتان روہت شرما 13، کیرن پولارڈ 7 رنز بنا سکے۔دہلی ڈیئر ڈیولز کی جانب سے امیت مشرا، پٹیل اور لیمی چن نے 3، 3 کھلاڑیوں کو آوٹ کیا اور امیت مشرا کو شاندار بولنگ پر مین آف دی میچ قرار دیا گیا اس کے ساتھ ہی ممبئی انڈینز کی ٹیم آئی پی ایل سے باہر ہو گئی۔