36ماہ کے دوران نئے ویزوں کی تعداد 65فیصد کم ہوگئی

ریاض.... سعودی وزارت محنت و سماجی بہبود نے گزشتہ 36ماہ کے دوران نئے ویزے 65فیصد کم جاری کئے۔ سب سے زیادہ ویزے ریاض پھر مکہ مکرمہ کے لئے جاری کئے گئے جبکہ شمالی حدود ریجن اور باحہ کے حصے میں سب سے کم ویزے آئے۔ تفصیلات کے مطابق گزشتہ 36مہینوں کے دوران نئے ویزوں کے اجرا میں 65فیصد کمی ریکارڈ کی گئی۔ 2015ءکے مقابلے میں 2017ءکے دوران نئے ویزے 65فیصد اور 2016کے مقابلے میں 51فیصد کم جاری کئے گئے۔ 2017ءمیں7 لاکھ18 ہزار 835، 2016 کے دوران14لاکھ3ہزار713اور 2015کے دوران 20لاکھ31ہزار291ویزے جاری کئے گئے۔ 2017ءکے دوران کھیتی باڑی، جنگلات، شکار اور ماہی گیری کےلئے 46630، کانوں، گیس، پیٹرول نکالنے کے کاموں اور پتھر کاٹنے کے لئے 672، امدادی صنعتوں کیلئے 41575، بجلی ، گیس اور پانی کیلئے 180، تعمیرات کے لئے 323611، ریٹیل اور تھوک کے کاروبار کیلئے 46424 ویزے جاری کئے گئے۔2017 ءکے دوران سب سے کم ویزے شمالی حدود اور الباحہ کیلئے جاری کئے گئے۔ ان کی تعداد 2698 تھی۔ علاوہ ازیں الجوف ، حائل، تبوک، قصیم، ریاض، مدینہ، شرقیہ، مکہ مکرمہ ، عسیر ، نجران ، باحہ اور جازان کیلئے ویزے جاری کئے گئے۔ سب سے زیادہ ویزے ریاض ریجن کیلئے جاری ہوئے انکی تعداد 339962 ریکارڈ کی گئی۔ ریاض کے بعدمکہ مکرمہ کے نصیب میں زیادہ ویزے آئے ان کی تعداد 120444رہی۔