وزیراعظم ہاوس کی بھینسیں بھی نیلام ہونگی

اسلام آباد..حکومت نے وزیراعظم ہاوس میں موجود 8 بھینسیں اور 4 ہیلی کاپٹرز بھی نیلام کرنے کا فیصلہ کر لیا ۔وزیراعظم عمران خان کے مشیر نعیم الحق نے بتایا کہ کیبنٹ ڈویژن کے پاس موجود 4 ہیلی کاپٹرز کسی کے زیراستعمال نہیں، اضافی گاڑیوں کی نیلامی کے بعد چاروں ہیلی کاپٹرز بھی نیلام کئے جائیں گے۔وزیراعظم کے مشیرنے بتایا کہ وزیراعظم ہاوس میں موجود 8 بھینسیں بھی فروخت کی جائیں گی جو سابق وزیراعظم نواز شریف نے اپنی غذائی ضروریات پوری کرنے کے لئے رکھی تھیں۔یاد رہے کہ وزیراعظم عمران خان نے کفایت شعاری پالیسی کے تحت وزیراعظم ہاوس کے زیراستعمال اضافی گاڑیوں کی نیلامی کا حکم دیا تھا جس کے بعد مجموعی طور پر 33 گاڑیاں نیلام کرنے کے لئے اشتہار بھی جاری کیا گیا جس کے مطابق 17ستمبر کی صبح 10 بجے گاڑیاں نیلامی کے لئے پیش کی جائیں گی۔ حاصل ہونے والی رقم قومی خزانے میں جمع کرائی جائے گی۔ نیلامی کے لئے پیش گاڑیوں میں 8 جدید لگژری بی ایم ڈبلیو اور 4 جدید مرسیڈیز بینز گاڑیاں شامل ہیں۔

مزید پڑھیں:اوورسیز پاکستانیوں کی واپسی،تحریک انصاف کا بڑا فیصلہ