پیپلزپارٹی نے مزاحمت کا اعلان کردیا

اسلام آباد...پیپلز پارٹی کے مرکزی سیکرٹری اطلاعات سینیٹر مولابخش چانڈیو نے منی بجٹ پر رد عمل میں کہا ہے کہ عمران خان نے ایک ماہ کی حکومت نے عوام چیخیں نکلوا دیں۔ ایک بیان میں انہوں نے کہا کہ لوگوں کو سبز باغ دکھانے والوں نے آتے ہی ہاتھ کھڑے کر د ئیے۔ایک طرف مہنگائی کی جا رہی ہے تو دوسری طرف ترقیاتی بجٹ کم کیا گیا۔ انہوں نے کہا کہ نواز شریف حکومت نے معیشت تباہ کی۔ عمران خان سرکار معیشت کا بیڑا غرق کر دیا۔ سیلیکٹ سرکار کی کوئی معاشی پالیسی ہے، خارجہ اور نہ داخلہ پالیسی ہے۔ایک ماہ میں حکومت نے پورا زور سویلین مناصب کو بے توقیر کرنے پر لگایا ۔ انہوں نے کہا کہ بھینسوں اور گاڑیوں کی نیلامی کا ڈرامہ اور سادگی کی شوبازی سے ملک نہیں چلا کرتے۔غریب عوام پر بوجھ ڈال کر کہتے ہیں کہ عوام پر بوجھ نہیں ڈالا جا رہا ۔بتایا جائے گیس کی قیمت بڑھنے کا بوجھ عوام پر کیسے نہیں پڑے گا۔ انہوں نے کہا کہ حکومت کی عوام دشمنی پہلے ماہ میں ہی کھل کر سامنے آچکی ہے۔ ایک طرف عوام دشمن اقدامات تو دوسری طرف وفاق کو کمزور کرنے کے اعلانات ہو رہے ہیں۔وزیراعظم عمران خان کے اعلانات براہ راست وفاق پر وار ہیں۔حکومت ہوش کی ناخن لے۔ عوام اور وفاق دشمن اقدامات کی مزاحمت کریں گے