فیصل رضا عابدی کیخلاف مقدمات،گرفتاری کا امکان

اسلام آباد...سپریم کورٹ اور اس کے ججز کے خلاف نازیبا زبان استعمال کرنے پر سابق سینیٹر فیصل رضا عابدی کے خلاف ایف آئی اےاور اسلام آباد پولیس نے مقدمات درج کر لئے،گرفتاری کا امکا ن ہے۔پولیس حکام نے کہا کہ سابق سینیٹر کے خلاف انسدا ددہشت گردی ایکٹ سمیت دیگر دفعات کے تحت مقدمہ درج کیا گیا۔ ایف آئی اے اور پولیس ان کے خلاف علیحدہ علیحدہ تحقیقات کریں گی۔ایف آئی اے میں درج مقدمے میں ویب چینل پرپروگرام کے دوران فیصل رضا عابدی نے ارادی طور پر اور مذموم مقاصد کے تحت چیف جسٹس ثاقب نثار کے خلاف نازیبا اور توہین آمیز زبان استعمال کی جو حکومت، عوام اور معاشرے میں خوف اور دہشت پھیلانے کے مترادف ہے۔مقدمے میں کہا گیا کہ فیصل رضا عابدی الیکٹرانک جرائم کے ایکٹ 2016 اور پاکستان پینل کوڈ کی متعدد دفعات کی خلاف ورزی کے مرتکب ہوئے۔ فیصل رضا عابدی کے خلاف الیکٹرانک کرائمز ایکٹ اور پاکستان پینل کوڈ کے تحت مقدمہ ایف آئی اے کے سائبر کرائم ونگ نے درج کیا۔فیصل رضا عابدی کے خلاف دوسرا مقدمہ تھانہ سیکریٹریٹ میں سپریم کورٹ کے تعلقات عامہ کے افسر شاہد حسین کی مدعیت میں درج کیا گیا۔مقدمے میں کہا گیا کہ سابق سینیٹر نے نازیبا، تضحیک اور دھمکی آمیز زبان استعمال کی اور آئین کے تحت تشکیل پانے والے سرکاری اداروں پر بے بنیاد الزامات لگائے۔