کویت اور بحرین میں کرونا کے مزید کیسز

کویت میں بدھ کو کرونا کے دو نئے مریضوں کا انکشاف ہوا ہے جبکہ بحرین میں بھی مزید تین مریض سامنے آئے ہیں۔

کویتی نیوز ایجنسی ( کونا) کے مطابق جن نئے مریضوں کا انکشاف ہوا ہے وہ بھی سابقہ کیسز کی طرح ایران سے آئے تھے۔

کویتی وزارت صحت نے کہا ہے کہ ’ملک میں کرونا کے مریضوں کی مجموعی تعداد 11 ہوگئی ہے‘۔

دوسری طرف بحرین میں بھی آج مزید 3 مریضوں کا اعلان کیا گیا ہے جن کے بعد اب کرونا کے مریضوں کی تعداد 26 ہوگئی ہے۔

سبق ویب سائٹ کے مطابق بحرینی وزارت صحت نے کہا ہے کہ ’متعلقہ اہلکار ایران سے آنے والے یا گزشتہ عرصے کے دوران وہاں رہنے والے تمام مسافروں کا معائنہ کر رہے ہیں‘۔

وزارت شہریوں اور مقیم غیر ملکیوں سے اپیل کی ہے کہ وہ اس سلسلے میں تعاون کریں اور احتیاطی تدابیر کے تحت اختیار کیے جانے والے اقدامات اور ہدایات کی پابندی کریں۔