’میچز ملتوی ہوئے تو طلاقیں بڑھ جائیں گی‘

ترک فٹبال کلب ٹرابزونسپور کے سربراہ نے کورونا وائرس پھیلنے کے خدشے کی وجہ سے سپر لیگ کے میچز کو ملتوی کرنے کی مخالفت کرتے ہوئے کہا ہے کہ اگر میچز نہ ہوئے تو ملک میں طلاق کے کیسز بڑھ جائیں گے۔

منگل کو خبر رساں ادارے اے ایف پی نے ترک ذرائع ابلاغ کے حوالے سے بتایا ہے کہ کلب کے سربراہ احمد اغاغلو نے کہا کہ ان کی ٹیم لیگ میں سب سے آگے ہے اور ٹرابزونسپور کو چیمپیئن قرار دیا جائے۔

انہوں نے کہا کہ ’اگر لیگ کے میچز ملتوی کیے گئے اور بغیر تماشائیوں کے کھیل ہوا، تو ایک ماہ بعد اس ملک میں ججز نہیں ملیں گے جو طلاق کے مقدمات سن سکیں۔‘

اے ایف پی کے مطابق اغاغلو کی ایک ویڈیو سامنے آئی ہے جس میں وہ چہرے پر ماسک لگائے میڈیا سے گفتگو کر رہے ہیں۔

ٹرابزونسپور پہلا بڑا فٹبال کلب ہے جس کا تعلق استنبول سے نہیں اور اس وقت ترک سپر لیگ میں پہلے نمبر پر ہے۔

ترکی میں حکومت نے کورونا وائرس کی روک تھام کے لیے کئی اقدامات کیے ہیں جن میں 20 ملکوں کے سفر پر پابندی، کھیلوں کے مقابلوں کا بغیر تماشائیوں کے انعقاد اور بڑے مذہبی اجتماعات سے اجتناب شامل ہیں۔

اے ایف پی کے مطابق آٹھ کروڑ 30 لاکھ کی آبادی والے ملک ترکی میں اب تک کورونا وائرس سے متاثرہ افراد کی تعداد 47 ہے اور تاحال کوئی ہلاکت رپورٹ نہیں ہوئی ہے۔