مہنگے ماسک فروخت کرنے والا غیر ملکی گروہ گرفتار

سعودی وزارت تجارت کی چھاپہ مارٹیموں نے میڈیکل ماسک کی آن لائن بلیک مارکیٹنگ کرنے والے غیر ملکی گروہ کو گرفتار کرکے ان کے قبضے سےایک لاکھ 40 ہزار ماسک برآمد کر لیے۔

ملزمان موجودہ صورتحال سے فائدہ اٹھاتے ہوئے طبی ماسک ذخیرہ کرنے کے بعد انہیں مہنگے داموں آن لائن فروخت کررہے تھے۔

 ویب نیوز ’سبق‘ کے مطابق وزارت تجارت کی جانب سے متعدد بار انتباہ دیاجاچکا ہے کہ کسی قسم کی طبی اشیا مہنگے داموں فروخت کرنے کے لیے ذخیرہ نہ کی جائیں۔

 وزارت تجارت کی جانب سے خلاف ورزی کے مرتکب افراد کے بارے میں رپورٹ کرنے کےلیے ایپلیکیشن بھی لانچ کی ہے جس کا عنوان ’بلاغ تجاری ‘ یعنی تجارتی خلاف ورزی کی رپورٹ رکھا ہے۔

ں وزارت نے تجارتی جعل سازی اور دیگر خلاف ورزیوں کےلیے ٹول فری نمبر 1900 بھی مخصوص کیا گیا ہے جس پر ذخیرہ اندوزی کرنے والوں کے بارے میں اطلاع دی جاسکتی ہے۔

یاد رہے ’کورونا‘ کی وجہ سے میڈیکل ماسک اور جراثیم کش محلول کی طلب میں غیر معمولی اضافہ ہو گیا۔ماسک اور سینیٹائزر کی بڑھتی ہوئی طلب کے پیش نظر منافع خوروں نے مارکیٹ سے بڑی تعداد میں ماسک اور جراثیم کش محلول سٹاک کرنا شروع کردیا۔

ذخیرہ اندوزی کے باعث 50 پیس والا ماسک کا پیکیٹ جو کہ عام حالات میں 8 ریال میں فروخت کیاجاتا تھا طلب بڑھنے کے بعد منافع خوروں نے اس کی قیمت 50ریال فی پیکٹ تک پہنچا دی۔

دوسری جانب جراثیم کش محلول کی 50 ملی لیٹر والی بوتل جوکہ عام حالات میں 5 ریال میں ملتی تھی ان دنوں 18ریال میں فروخت کی جارہی ہے۔

 وزارت تجارت کا کہنا ہے کہ تفتیشی ٹیمیں ذخیرہ اندوزوں کے خلاف سرگرم عمل ہیں۔لوگوں کو چاہئے کہ وہ ایسے ذخیرہ اندوزوں کے بارے میں وزرات کو مطلع کریں۔