خاتون سے گاڑی چھین کر کچلنے کی کوشش، ملزم گرفتار

 سعودی عرب میں جازان ریجن میں پولیس نے خاتون کی گاڑی چھین کرفرار ہونے والے ملزم کو انتہائی مختصر وقت میں گرفتار کرلیا۔ ملزم نے گاڑی چھین کر مزاحمت پر خاتون کو کچلنے کی کوشش کی جس سے خاتون زخمی بھی ہوئی۔ 

سبق نیوز نے اپنے ذرائع کے حوالے سے بتایا کہ جازان کمشنری میں ایک خاتون نے پولیس میں رپورٹ درج کرائی کہ نامعلوم شخص نے اس کی گاڑی چھینی اور فرار ہو گیا۔ پولیس نے رپورٹ درج کرتے ہی علاقے کی ناکہ بندی کردی تاکہ ملزم کو جلد ازجلد گرفتار کیا جاسکے۔ 

پولیس کی فوری اور جامع انداز میں کارروائی کے مثبت نتائج برآمد ہوئے۔ چور کو علاقے کے سرحدی مقام سے گرفتار کرلیا گیا اگرچہ اس نے گاڑی کی نمبر پلیٹ بھی تبدیل کرلی تھی۔ 

ملزم نے خاتون کے کریڈٹ کارڈ سے خریداری بھی کی تھی ۔ پولیس نے ملزم کے خلاف مقدمہ درج کرکے اسے متعلقہ تھانے کے حوالے کردیا جبکہ گاڑی خاتون کے حوالے کردی گئی۔ 

 تحقیقاتی ادارے ملزم سے مزید تفتیش کر رہے ہیں تاکہ معلوم کیاجاسکے کہ اس کا تعلق کہیں کسی دہشتگرد تنظیم سے تو نہیں۔

خود کو اپ ڈیٹ رکھیں، واٹس ایپ گروپ جوائن کریں