سعودی سفیر کی چیئرمین سینیٹ سے ملاقات

پاکستان کی پارلیمان کے ایوان بالا کے چیئرمین محمد صادق سنجرانی سے سعودی عرب کے سفیر نواف بن سعید المالکی نے ملاقات کی ہے۔

ملاقات میں دوطرفہ تعلقات سمیت اہم امور پر تبادلہ خیال کیا گیا۔

سینیٹ میڈیا سیل سے جاری ہونے بیان کے مطابق ملاقات کے دوران سینیٹ کے چیئرمین محمد صادق سنجرانی نے سعودی سفیر سے گفتگو میں کہا کہ دونوں ملکوں کے درمیان برادرانہ تعلقات ہیں۔ ہر مشکل وقت میں دونوں ممالک ایک دوسرے کے ساتھ کھڑے رہے ہیں۔

انہوں نے کہا کہ دونوں ممالک ہمیشہ بین الاقوامی معاملات اور مسائل پر مشاورت سے کام کرتے ہیں۔

انہوں نے کہا کہ اسرائیل کے حوالے سے متحدہ عرب امارات کے فیصلے کے دور رس نتائج ہوں گے۔

انہوں نے کہا کہ پارلیمان بالخصوص ایوان بالا کی جانب سے اس عزم کا اعادہ کرتے ہیں کہ حرمین شریفین کی حفاظت کے لیے کسی قربانی سے گریز نہیں کیا جائے گا۔ سعودی عرب کی جانب سے ہر مشکل وقت میں پاکستان کے ساتھ کھڑے رہنے کو کبھی فراموش نہیں کر سکتے۔ امید کرتے ہیں کہ سعودی عرب بھی اسی جذبے کے ساتھ تعاون جاری رکھے گا۔

چیئرمین سینیٹ نے سعودی فرماں روا شاہ سلمان بن عبدالعزیز اور ولی عہد شہزدہ محمد بن سلمان کے لیے نیک خواہشات کا بھی اظہار کیا۔