ملتان: انڈسٹریل اسٹیٹ میں گیس سے بھرے باؤزر میں دھماکہ، 5 ہلاک اور 25 زخمی
زخمیوں میں 13 افراد کی حالت تشویشناک ہے۔ (فائل فوٹو)
ملتان کی انڈسٹریل اسٹیٹ میں گیس سے بھرے ایل پی جی باؤزر میں دھماکے کے نتیجے میں پانچ افراد ہلاک اور 31 زخمی ہو گئے۔
ریسکیو حکام کے مطابق دھماکے کے بعد باؤزر میں آگ لگ گئی اور اس کے ٹکڑے قریبی آبادیوں پر جا گرے۔
آگ پر قابو پانے کے لیے 10 سے زائد ریسکیو گاڑیاں اور فوم کا استعمال کیا گیا۔
ایک بیان میں سی پی او ملتان صادق علی نے بتایا کہ ایل پی جی باؤزر دھماکے میں کئی مکانات تباہ ہوئے اور جانور بھی جھلس کر ہلاک ہو گئے۔
ان کا کہنا تھا کہ گیس کا اخراج ابھی تک جاری ہے، جس کی وجہ سے علاقے کو خالی کرا لیا گیا ہے۔
پولیس کے مطابق دھماکے میں ہلاک ہونے والوں میں ایک بچی سمیت تین خواتین اور دو مرد شامل ہیں۔ زخمیوں میں 13 افراد کی حالت تشویشناک ہے۔
ڈسٹرکٹ ایمرجنسی آفیسر کے مطابق نشتر ہسپتال میں ایمرجنسی نافذ کر دی گئی ہے اور ملحقہ آبادیوں میں سرچ آپریشن جاری ہے۔ جائے حادثہ اور اطراف میں بجلی اور گیس کی فراہمی بند کر دی گئی ہے۔
