پاکستان میں کورونا سے مزید 12 اموات، 1123 نئے مریض

دنیا کے دیگر ممالک کی طرح پاکستان میں بھی کورونا وائرس کی دوسری لہر جاری ہے اور ملک میں وبا کے مریضوں اور اموات میں آہستہ آہستہ اضافہ ہو رہا ہے۔

پیر کو نیشنل کمانڈ اور آپریشن سینٹر کی جانب سے جاری ہونے والے اعداد و شمار کے مطابق گذشتہ 24 گھنٹوں کے دوران ملک بھر میں 27 ہزار 953 ٹیسٹ کیے گئے جن میں سے 1123 افراد کا کورونا ٹیسٹ مثبت آیا ہے۔

اس وقت پاکستان میں کورونا کے فعال کیسز کی تعداد 13 ہزار 242 ہوگئی ہے جبکہ مزید 12 افراد جان سے ہاتھ دھو بیٹھے ہیں۔

ملک میں اب تک 3 لاکھ 35 ہزار 93 افراد میں کورونا وائرس کی تشخیص ہوئی ہے جبکہ 3 لاکھ 15 ہزار 16 مریض صحت یاب بھی ہوئے ہیں۔  

حکام کے مطابق گذشتہ 24 گھنٹوں کے دوران ملک میں کورونا کے 27 ہزار 953 ٹیسٹ کیے گئے۔

این سی او سی کے مطابق پاکستان کے زیرانتظام کشمیر اور بلوچستان میں کوئی مریض وینٹی لیٹر پر نہیں ہے جبکہ مریضوں کے لیے مختص 1884 وینٹی لیٹرز میں سے 119 زیراستعمال ہیں۔